BBC логотипи билан Зеленскийга оид сохта видео тарқатилди

Интернетда Пол Сезанннинг ўғирланган “Гилослар билан натюрморт” картинаси Украина президенти Володимир Зеленскийнинг кабинетига осилгани ҳақида сохта репортаж тарқатилди. Видеода BBC News логотипи бор, аммо медиакорпорация сайтида бундай сюжет эълон қилинмаган. BBC вакиллари видео сохта эканини маълум қилган.

Фото: Видеодан кадр

24 апрель, жума куни France 24 ва Euronews ушбу материал бўйича ўз текширувларини эълон қилди. Уларнинг маълумотига кўра, ёлғон хабарни тарқатган аккаунтлар Зеленский картинани мафиядан олганини даъво қилган. Бир неча соат ичида ролик фақат X ижтимоий тармоғидаги битта профилда 400 минг мартадан ортиқ кўрилган.

Аслида эса Володимир Зеленскийнинг деворида украиналик рассом Андрей Чеботарунинг асарлари осилган.

France 24 хабарига кўра, машҳур ОАВ маҳсулоти сифатида кўрсатилган сохта материалларни тарқатиш — Россия ГРУ билан боғланадиган “Шторм-1516” дезинформация тармоғининг классик усулларидан бири ҳисобланади. Бу ҳақда мазкур тармоқни кузатиб борувчи Gnida Project France 24ʼга маълум қилган.

Гилослар билан натюрморт / © WEB/FONDAZIONE MAGNANI

France 24 ёзишича, сўнгги уч йил давомида фаолият юритиб келаётган ушбу тармоқ Франция ва Ғарб давлатларига қарши қаратилган кўплаб дезинформация операциялари ортида тургани тахмин қилинади. Бу ҳақда бир нечта ҳисоботларда, жумладан, хорижий аралашувга қарши курашиш билан шуғулланувчи Франция давлат органи — Viginum ҳисоботида қайд этилган.

Бундан ташқари, “Шторм-1516” тармоғи АҚШ Молия вазирлиги томонидан ҳам Россия ГРУ ва Москвадаги “Геосиёсий экспертиза маркази” билан очиқчасига боғланган.

Euronews эса мазкур публикацияни Кремлга яқин дезинформация тармоғи — “Матрёшка” билан боғлаган.