Зеленский АҚШнинг Украинага босими кучайганини айтди

Яқин Шарқдаги вазият, шубҳасиз, президент Трампга ва, менимча, унинг кейинги қадамларига таъсир кўрсатмоқда, деди Владимир Зеленский Reuters агентлигига. Унинг таъкидлашича, АҚШ Украина Қуролли кучларидан Донбассдан тўлиқ чиқиб кетишни талаб қилмоқда.

Фото: Michael Kappeler/dpa/Global Look Press

АҚШ Украинага тинчлик келишуви доирасида ваъда қилинган хавфсизлик кафолатларини беришни Киевнинг Россияга катта ҳудудларни топширишига боғламоқда: Вашингтон Донбасснинг бутун ҳудудини Россияга беришни талаб қилмоқда. Бу ҳақда Украина президенти Володимир Зеленский 25 март, чоршанба куни Reuters агентлигига берган интервюсида маълум қилди.

«Америкаликлар Украина Донбассдан қўшинларини олиб чиқишга тайёр бўлиши биланоқ, ушбу кафолатларни юқори даражада тақдим этишга тайёр», — деди у.

Зеленскийнинг айтишича, АҚШ президенти Доналд Трамп урушни тезроқ якунлашни талаб қилмоқда ва бу Эрон атрофидаги вазият билан боғлиқ.

«Яқин Шарқ, шубҳасиз, президент Трампга ва, менимча, унинг кейинги қадамларига таъсир қилмоқда», — деди у.

Украина президентининг таъкидлашича, Трамп ҳали-ҳамон Киевга босимни кучайтириш стратегиясини танламоқда.

Володимир Зеленский Украина Қуролли кучларининг Донбассдан тўлиқ чиқиб кетиши Киев, шу билан бирга Европа хавфсизлигига таҳдид солишидан огоҳлантирди. Унинг тушунтиришича, минтақада кучли мудофаа позициялари мавжуд ва бундай ҳолатда улар Москва назорати остига ўтиб кетади.

Январ ойидаёқ Зеленский Украина ва АҚШ ўртасидаги хавфсизлик кафолатлари ҳақидаги ҳужжат юз фоиз тайёр эканини ва фақат имзоланишини кутаётганини айтган эди. Бироқ 24 март куни Майамида АҚШ ва Украина делегациялари ўртасида бўлиб ўтган музокаралардан сўнг, Украина раҳбари келишув устида яна ишлаш кераклигини билдирди, деб қайд этди Reuters.

Бундан аввал, 7 феврал куни, Зеленский Вашингтон Украинадаги урушни июнгача якунлашни талаб қилганини айтган эди.

«Америкаликлар томонларга урушни шу ёз бошигача тугатишни таклиф қилмоқда ва эҳтимол, томонларга айнан шу жадвал бўйича босим ўтказади. Нега айнан шу ёзгача? Биз тушунамизки, Американинг ички масалалари уларга таъсир қилмоқда ва, эҳтимол, улар учун янада долзарб бўлади, — дея Украина президентидан иқтибос келтирган эди “Укринформ” агентлиги. — Эҳтимол, уларда бошқа устувор масала — Конгресс бўлади. Ва биз тушунамизки, улар бутун вақтини айнан ички сиёсий жараёнларга бағишлайди».

АҚШда сайловолди кампанияси ёз бошида старт олиши кутилмоқда. Шу билан бирга, Украина президенти музокаралар муваффақиятсиз тугаган тақдирда Вашингтон музокара жараёнидан чиқиб кетишини кутмаганини айтди.