Hilton’даги ҳужум. Асосий маълумотлар

Вашингтондаги Hilton меҳмонхонасида Трамп иштирокидаги кечки овқат маҳали отишма чиқди. Президент жабрланмаган, ҳужум қилган шахс ушланган. Худди шу меҳмонхона атрофида 1981 йилда Рейганга ҳам суиқасд уюштирилганди.

Вашингтонда 25 апрел куни кечқурун Оқ уй мухбирлари ва президент Доналд Трамп иштирокидаги тадбир чоғида отишма рўй берди. Президент жароҳат олмаган, Махфий хизматнинг бир ходими жароҳатланган. Ўт очган шахс – 31 ёшли Коул Томас Аллен – қўлга олинган. «Медуза» ҳозиргача нималар маълумлиги ҳақида ёзди.

Вашингтон матбуот вакиллари билан кечки овқатни Оқ уй ҳузуридаги мухбирлар уюшмаси (WHCA) ташкиллаштирганди, бу тадбир анъанавий равишда апрел ойининг охирги шанбасида Washington Hilton меҳмонхонасида ўтказилади. Биринчи президентлиги даврида уюшма таклифини эътиборсиз қолдирган Трамп шу куни тадбирга илк бор ташриф буюрганди.

Вашингтон вақти билан соат 20:36 да (Тошкент вақти билан 5:36) Махфий хизматнинг меҳмонхона ҳоллида ўрнатилган назорат-ўтказиш пунктига бир неча қуролга эга бўлган шахс бостириб кириб, ҳуқуқ-тартибот органлари ходимлари билан отишмага киришган. Аммо уни тезда ерга ётқизиб, қўлига кишан тақишган. Полиция кейинроқ унинг ёнида сочма милтиқ, тўппонча ва бир нечта тиғли қуроллар бўлганини маълум қилди.

Ҳужум чоғида Махфий хизматнинг бир ходими енгил жароҳат олган (зирҳли нимча унинг ҳаётини сақлаб қолган). Унга аллақачон шифохонадан жавоб берилган.

Отишма чиққан пайтда Трамп, унинг маъмурияти вакиллари ҳамда журналистлар конференц-залда ўтиришганди. Махфий хизмат ходимлари дарҳол президент ва унинг рафиқасини олиб кетишган, қолганлар эса столлар остига яширинишига тўғри келган. Шундан сўнг қуролланган агентлар зални кўздан кечириб чиқишган.

Тадбирга борган журналистларнинг айтишича, залда ўқ овозлари эшитилмаган. NBC телеканалининг Оқ уйдаги мухбири Гейб Гутеррес зиёфат «кутилмаганда тўхтаб қолгани»ни айтган. NBC телебошловчиси Том Лламаснинг сўзларига кўра, Махфий хизматнинг қуролланган ходимлари залга кутилмаганда югуриб киришган ва отишма ҳақида хабар қилишган. Шундан кейин барча столлар остига яширинган.

«[Давлат котиби Марко Рубио] столнинг нариги тарафида ўтирган рафиқаси ҳақида қаттиқ қайғурди. У Трампга ҳам қараб қўяр эди: Нима бўлаётгани тушунарсиз эди. Биз Трампга жуда яқин масофада эдик», – дейди Лламас.

Washington Hilton меҳмонхонасидан Америка президентлари иштирокидаги тадбирларни ўтказиш учун тез-тез фойдаланиб туришади. 1981 йил мартида ушбу меҳмонхона олдида ўша вақтдаги президент Роналд Рейганга суиқасд уюштирилганди: ўшанда меҳмонхонадан чиқиб, ўз лимузинига бораётган президентга тўппончадан ўқ узилган.

Рейган қўлтиқ қисмидан енгил жароҳатланиб, қовурғаси синган ва 12 кун шифохонада ётган. Ҳужум оқибатида жами тўрт киши яраланган, хусусан, президент матбуот котиби Жеймс Брейди миясидан оғир жароҳат олган. Уларга ўқ узган 25 ёшли Жон Ҳинкли ўшанда ўз ҳаракатини актриса Жоди Фостерга ёқишга уриниш билан изоҳлаган, кейинроқ у руҳий касал деб топилиб, даволанишга ётқизилган, фақат 2016 йилга келиб озодликка чиққан.

Ўт очган шахс ҳақида нималар маълум?

Ҳужумчининг шахси расман очиқланмаган, аммо Америкадаги йирик нашрлар аллақачон бу Калифорния штати Торранс шаҳрида яшаган 31 ёшли Коул Томас Аллен бўлганини ёзиб чиқди. Полиция қайд этишича, у катта эҳтимол билан, меҳмонхона мижозларидан бири бўлган.

Аллен ёлғиз ҳаракатланган. У отишма чоғида яраланмаган, аммо текширув ўтказиш учун шифохонага олиб борилган. Расмий маълумотларга кўра, у судланмаган ва ҳуқуқ-тартибот органлари рўйхатида турмаган. Унинг мотивлари ҳозирча номаълум. CBS News манбасига кўра, сўроқ чоғида у президент маъмурияти вакилларини нишонга олганини айтган, лекин Трампнинг ўзини нишон сифатида тилга олмаган.

Алленнинг Linkedin’даги профилидан маълум бўлишича, у 2017 йилда Калифорния технология институтини битириб, машинасозлик соҳасида бакалавр даражасини олган. Ушбу олий ўқув юрти NBC учун изоҳида ўзининг шундай талабаси бўлганини тасдиқлаган.

2025 йил майида Аллен Калифорния давлат университетида компютер фанлари бўйича магистр даражасини олган. Профилида муҳандис механик бўлиб ишлагани, кейин эса видеоўйинлар ишлаб чиқиш билан шуғуллангани, шунингдек, ўқитувчилик қилгани айтилади. Алленнинг синфдошлари NBC мухбири билан суҳбатда уни «қарийб даҳо» ва «жуда вазмин одам» деб атади.

Гумонланувчига зўравонлик жиноятини содир этишда ўқотар қуролдан фойдаланиш ва федерал ходимга хавфли қурол билан ҳужум қилиш бўйича айбловлар қўйилган, деди журналистларга Вашингтон прокурори Жанин Пирро. Унинг қўшимча қилишича, Аллен 27 апрел, душанба куни федерал суд олдида жавоб беради.

Трампнинг ўзи ҳужум ҳақида нималар деди?

Воқеадан кўп ўтмай Трамп Truth ижтимоий тармоғида бу «ғаройиб оқшом» бўлганини ёзиб, меҳмонхонадаги кузатув камерасига ёзиб олинган видеони бўлишган. Видеода хавфсизлик хизмати ходимлари турган йўлак бўйлаб бир киши чопиб ўтганини кўриш мумкин. У ўтиб кетганидан кейин ходимлар қуролларини чиқаришган ва унинг ортидан қувишга тушишган.

Вашингтонда ғаройиб оқшом. Махфий хизмат ва ҳуқуқ-тартибот идоралари ажойиб иш олиб боришди. Улар жуда тез ва дадил ҳаракатланишди. Ҳужумчи қўлга олинди ва мен «ШОУНИ ДАВОМ ЭТТИРИШГА РУХСАТ БЕРИШ»ни тавсия этдим, аммо ҳуқуқ-тартибот органлари кўрсатмаларига амал қиламан.

Отишмадан кўп ўтмай ўтказилган фавқулодда матбуот анжуманида Трамп Махфий хизмат ходимларини мақтаб, «реакция қилиш вақти ақл бовар қилмас даражада тез» бўлганини айтди. Унинг сўзларига кўра, у меҳмонхонада қолиш ва кечки овқатни давом эттириш учун «жон-жаҳди билан курашган», бироқ ҳуқуқ-тартибот идоралари хавфсизлик нуқтаи назаридан тадбирни бекор қилиш кераклигини таъкидлаган.

«Мен [яраланган] зобит билан ҳозиргина гаплашдим ва унда барчаси жойида», – деган президент ва офицер «ажойиб формада» ва «жуда кўтаринки кайфиятда» эканини қўшимча қилган. «Биз уни севамиз ва ҳурмат қиламиз. Ва у ўз иши билан жуда фахрланади», – дея қўшимча қилган Америка президенти.

Трамп шовқин эшитганини, аммо бу ўқ овозлари эканини тушунмаганини айтди: «Мен шовқинни эшитдим ва буни патнис тушиб кетиши овози деб ўйладим. Менимча, Мелания нима бўлганини жуда яхши тушунган. Менимча, у нима бўлганини дарҳол тушунди. У: „Бу ёмон овоз“, деди», – дейди Трамп.

«Мен қотилликларни ўрганганман ва айтишим керакки, буни энг кўп қилганлар энг катта таъсирга эга одамлар. Айнан уларга ов эълон қилинган. Бу билан фахрланаман, дейишни ёқтирмайман, аммо мен кўп нарсага эришдим», – деган Трамп журналистларга.

Бу хавфли касб. Аммо мен ундай деб ҳисобламайман. Мен ўз ишимни қилиш учун шу ердаман. Бу ишнинг бир қисми – бу хавфли иш – мен бундан ҳам хавфлироқ касбни тасаввур қила олмайман. Аммо мен ўз мамлакатимни севаман ва у билан жуда фахрланаман.

Трамп ҳазиллашиб, агар дуч келадиган хавф-хатарлар ҳақида олдиндан билганимда, ўз номзодини қўймаслигим ҳам мумкин эди, деб айтди (2024 йилнинг ёзида у Пенсилваниядаги сайловолди митингида яраланган, қулоғига ўқ текканди).

Трамп журналистларга 30 кун ичида янги кечки овқат ўтказишга ваъда берган: «Биз [кечки овқатни] давом эттиришни жуда хоҳлардик, чунки мен бу касал одамлар, бу бандитлар, бу даҳшатли, даҳшатли одамлар ҳаётимизнинг асосини ўзгартиришини хоҳламайман».