ПСЖ ва «Бавария» футбол шаъни учун жанг қилиб, биргаликда ғолиб бўлишди

Орангизда футбол мухлислари бўлса, 28 апрелни календарингизда футбол тантана қилган кун деб белгилаб қўяверинг, кеча тунда Парижда тарихий ўйин бўлди. Дунёнинг энг кучли икки жамоаси прагматизм, натижа, тактика деган нарсаларни бир чеккага йиғиштириб, шунчаки футбол ўйнашди.

Майдонда худди миллион-миллион доллар маош оладиган, гарданида миллионлаб мухлислар олдида масъулияти бор профессионал футболчилар эмас, қўшни қишлоқ жамоасига ютқазиб қўйса, қишлоққа қайси юз билан қайтиш ҳақида ўйлаётган бўзйигитлар ўйнаётгандек бўлди. Парижда натижа асосига қурилган замонавий футбол 90 дақиқа давомида икки буюк жамоанинг такрорланмас ўйинига таъзим қилди. Шунчалик зўр ўйин бўлдики, икки жамоа мураббийлари бир-бирларини табриклашди, чунки майдондаги йигитлар, бири майдон четида, бир трибунада ўтирган икки даҳо мураббий Парижда футболнинг шаъни учун жанг қилиб, иккови ҳам ғолиб бўлди.

Ҳамма нарса бўлди

Мен ўйин хронологиясига тўхталмоқчи эмасман, футбол мухлислари уни аллақачон бир неча марталаб кўриб олишгандир. Сўзимиз аввалида Париждаги ўйинни футбол учун жанг деб атадик. Чунки охирги вақтларда футбол анъаналари бузилиб кетди, натижа ҳамма нарсадан устун бўлиб қолди, жамоалар натижа босими сабаб жуда прагматик, ҳисобни ушлашга асосланган ўйинлар қила бошлашди. Кап-катта жамоалар уялмай бурчак зарбаларидан урилган голларни асосий қиролига айлантириб олди. Нега десангиз, «натижа!», деб жавоб беришади. Ахир натижа футболчининг ҳаётини белгилаб берадиган омилга айланиб қолди.

Кийишга бутсаси ҳам йўқ оддий бразилиялик йигит Европага келиб синов ўйинида ҳаммани алдаб ўтса, тўпни бошида 500 марта жанглёр ўйнатса ҳам, мураббийлар ундан «Яна нечтасини алдаб ўта оласан?», деб эмас, «Тактикани қандай тушунасан?», деб сўрайдиган бўлишди. Бразилияда бутун қишлоғини алдаб гол уриб юрган боладан Европада Пеледан меърос жинга услубида футбол ўйнашни сўрашмаяпти, таянч зонаси ва марказий ҳимоячилар ўртасидаги бўшлиқдан фойдаланишни, рақиб ҳужум қилаётганда уни қандай қилиб сунъий офсайдда қолдиришни, 4-2-3-1 тактикасида қайси чизиқлардагина ўйнаши мумкинлигини ўргатишмоқда. Пеленинг меъросхўрларидан бири Вини Жуниор ҳам ана шу тактика домига тушиб футболчиларни алдамай қўйди. Футболда Неймарлар чиқмаяпти, бу ажойиб ўйиннинг жозибаси йўқолди, тактика аталмиш қобиқ уни борган сари зерикарли ўйинга айлантириб қўйди.

Тўғрида, тактика натижа келтириш эҳтимоли юқори, тактика ёрдамида ўша жинга усулида ўйнайдиган бразилияликни осон тўхтатиш мумкин. Натижа ҳамма нарсадан муҳим, натижа бўлмаса пул йўқ, пул бўлмаса, кун ўтмайди. Чемпионатларда мукофот жамғармалари ҳам натижага қараб тақсимланади – яшасин тактика, яшасин натижа!

Кеча ПСЖ ва «Бавария» худди замонавий футбол анъаналарига исён қилгандек майдонга тушиб, бутун дунёни лол қолдирди. Ўйинда ҳамма нарса бўлди: қанотдан ёриб кириб урилган гол керакми? Марҳамат, Хвича икки марталаб урди. Бўйи «икки қарич» Невеш бош билан гол урди, Харри Кейн инглизча совуққонлик билан портлай деб турган стадион ҳайқириғини эшитмагандек пеналтидан гол урди, бонусига майдон марказидан голли узатма амалга оширди. Олисе бразилчасига ҳаммани алдаб гол урди. Ҳаммаси тўкис бўлиши учун Упамекано стандартдан кейин бош билан гол ҳам уриб берди, майли, Европача голдан ҳам бўлсин дегандек. Хуллас, Ману Нойернинг сейвларидан бошқа ҳамма нарса бўлди кечаги ўйинда. «Бавария»нинг тўртинчи голини ҳисобларкан бош ҳакам ҳам беихтиёр кулиб қўйди, «Қандай ўйинниб бошқаряпман-а!», дегани эди бу.

Бугун дунё футбол оиласи шу ўйинни муҳокама қилди, ҳамма ундан завқланганини айтди. Қизиғи, ҳеч ким ПСЖ ғолиб бўлганига эътибор бермади, чунки Бавария мағлуб номига муносиб эмасди. Кимсан Эрлинг Ҳоланд чидолмай ўз саҳифасида «Қандай ажойиб ўйин», деб ёзиб юборди. Кеча икки катта кучланишли ток уланган симлар туташиб кетди, портлаш овозини бутун дунё эшитди. Венсан Компанининг «Бавария»си «Реал»ни бежизга чиқариб юбормаганини исботлади, ПСЖ эса Луис Энрике билан кўз ўнгимизда буюк жамоага айланиб бораётганини кўрсатди. Парижликлар ниҳоят тўғри мураббий топиб, футболчиларни Instagram'даги ўқувчилар сонига қараб эмас, маҳоратига қараб танлай бошлади. Натижа шунчаки фантастик.

Бу гапни яна такрорлашдан чарчамайман, ПСЖ ва «Бавария» тактика домига тортиб бораётган замонавий футбол шаъни учун жанг қилиб, биргаликда ғолиб бўлишди. Ёмони – ўйин атиги 90 дақиқада тугаб қолди, лекин юпанч учун жуда зўр факт бор, шубҳасиз, дунёнинг айни дамдаги энг кучли икки жамоаси эканини исботлаган ПСЖ ва «Бавария» кейинги ҳафта Мюнҳенда яна бир ўйинда майдонга тушади.

Айтганча, ЕЧЛда ҳали яримфинал, бу даҳолардан бири тушиб кетади. Яримфиналнинг нариги жуфтлигида буткул бошқача жамоалар учрашади: бири «бурчак зарбалари қироли», бири майдонни «автобус паркига» айлантира олишидан фахрланадиган жанубий америкалик «безорилар жамоаси»...