Трамп ИШИД етакчиларидан бири йўқ қилинганини айтди

АҚШ қўшинлари Нигерия ҳарбийлари кўмагида Африкада яшириниб юрган «Ислом давлати» (ИШИД) етакчисини йўқ қилди, деди президент Доналд Трамп.

Унинг сўзларига кўра, гап «дунёдаги энг фаол террорчи» бўлган ИШИД гуруҳининг иккинчи муҳим раҳбари Абу Билол ал-Минукий (Абу Майнук) ҳақида кетмоқда. «У энди Африка халқларини қўрқитмайди ва америкаликларга қарши операцияларни режалаштиришда ёрдам бермайди. Унинг йўқ қилиниши билан ИШИД глобал фаолияти сезиларли даражада заифлашди», деб ёзди Трамп Truth Social ижтимоий тармоғида ва Нигерия ҳукуматига ҳарбий операцияни ўтказишда кўрсатган ёрдами учун миннатдорчилик билдирди.

Трампнинг айтишича, декабрь ойида АҚШ қўшинлари мамлакат ҳукумати билан хавфсизлик ва разведка соҳасидаги ҳамкорлик доирасида Нигериядаги ИШИД нишонларига «кучли ва ҳалокатли» зарба берган эди. Шундан сўнг, 2026 йил февраль ойида Трамп Нигерия кучларига террорчиларга қарши курашда ёрдам берадиган ҳарбий хизматчиларнинг «кичик гуруҳини» Нигерияга юборди. Нигерия президенти Бола Аҳмад Тинубу ўз навбатида ал-Минукий Чад кўли ҳавзасидаги террорчи мажмуасига берилган зарба пайтида бир неча сафдошлари билан бирга йўқ қилинганини тасдиқлади.

Нигерия қўмондонлиги хабарига кўра, операция мамлакат шимоли-шарқидаги Борно штатида ўтказилган. Ушбу минтақада «Боко Ҳаром» террорчилик гуруҳи ва ундан ажралиб чиққан «Ғарбий Африка Ислом Давлати» (ISWAP) гуруҳи бошчилигидаги исёнчилар ҳаракати 17 йилдан бери давом этмоқда, оқибатда минглаб одамлар ҳалок бўлди ва 2 миллион киши ўз уйини тарк этди, деб ёзади Reuters.

Нигерия фуқароси Ал-Минукийнинг ўзи 2023 йилда собиқ президент Жо Байден маъмурияти томонидан «ўта хавфли халқаро террорчилар» рўйхатига киритилган эди.