АҚШ музокараларни қайтадан бошлаш учун Эронга бешта шарт қўйди - ОАВ

Теҳроннинг тинчлик музокараларининг иккинчи босқичини бошлашдан олдин бажарилишини талаб қилган беш шартига жавобан Вашингтон ҳам ўзининг беш талабини илгари сурди. Бу ҳақда Эроннинг Fars агентлиги хабар берди.

Қайд этилишича, АҚШ шартлари қуйидагича:

АҚШ томонидан ҳеч қандай компенсация тўланмаслиги;

Эроннинг 400 кг урани АҚШга топширилиши;

Эрон ядровий объектларидан фақат битта мажмуанинг ишлаши;

Эрон активларининг ҳатто 25 фоизини ҳам музлатувдан чиқармаслик;

барча фронтлардаги жанговар ҳаракатларни тўхтатишни музокараларнинг ўтказилиши ва бориши билан боғлаш.

Агентликнинг таъкидлашича, Эрон ушбу шартларни бажарган тақдирда ҳам АҚШ ва Исроил томонидан тажовуз хавфи сақланиб қолади.

Ушбу ҳафтада Эрон музокараларни қайта бошлаш учун ўзининг бешта шартини илгари сурганди:

барча фронтларда, айниқса Ливанда урушни тугатиш;

Эронга қарши санкцияларни бекор қилиш;

Эрон маблағларини музлатувдан чиқариш;

жанговар ҳаракатлар оқибатида етказилган зарар учун компенсация тўлаш;

Эроннинг Ҳўрмуз бўғози устидан суверенитет ҳуқуқини тан олиш.

«Ушбу шартлар йиғиндиси фақат музокаралар жараёнига қайтиш учун минимал ишонч муҳитини яратиш доирасида белгиланган бўлиб, Теҳрон ушбу бандлар амалий жиҳатдан бажарилмас экан, янги музокараларга киришиш мумкин эмас деб ҳисоблайди», — дейилган Эрон томони баёнотида.

Май ойи бошида Эрон АҚШга 14 банддан иборат тинчлик режасини тақдим этган, унда жанговар ҳаракатларни тўхтатиш, ҳужум қилмаслик кафолатлари, денгиз қамалини бекор қилиш, активларни музлатувдан чиқариш ва Америка қўшинларини олиб чиқиш талаб қилинган. Tasnim маълумотига кўра, Теҳрон асосий масалаларни 30 кун ичида ҳал қилишни таклиф қилган ва сулҳни узайтиришга эмас, «урушни тугатиш»га урғу берган

The Wall Street Journal ёзишича, Эрон аввал жанговар ҳаракатларни тўхтатиш ва Ҳўрмуз бўғози орқали тижорат кемалари қатновини босқичма-босқич тиклашни таклиф қилмоқда. АҚШ эса бунга параллел равишда Эрон портлари ва кемаларига қўйилган чекловларни бекор қилишни таклиф этган. WSJ маълумотига кўра, асосий келишмовчилик Эроннинг ядровий дастури масаласида: Вашингтон ядровий инфратузилма ва уран захиралари бўйича мажбуриятларни олдиндан белгилашни талаб қилмоқда, Теҳрон эса буни алоҳида 30 кунлик музокараларга қолдиришни истамоқда.

Шунга қарамасдан, АҚШ президенти Доналд Трамп Эрон таклифларини қабул қилиб бўлмайдиган деб атади. Теҳронда эса «ўзини АҚШ президенти деб атаётган шахс»нинг реакцияси улар учун «ҳеч қандай аҳамиятга эга эмаслиги» айтилди.

Ҳозирда томонлар ўртасида апрел ойи бошида имзоланган ва АҚШ президенти томонидан номаълум муддатга узайтирилган сулҳ амал қилмоқда. Бироқ май ойи бошида томонлар ўзаро зарбалар алмашган.