Ҳар куни қаҳва ичишнинг саломатлик учун 4 та фойдаси

Қаҳва шунчаки тетиклашиш усули эмас. У саломатлик учун бир қатор афзалликларга эга: ичак фаолиятини қўллаб-қувватлашдан тортиб, вазн йўқотишга ёрдам беришгача. Бу ҳақда Verywell Health фармацевтика фанлари доктори Ли Веддл томонидан текширилган мақолада ёзмоқда.

Мақолада қаҳва истеъмол қилишнинг 4 та афзаллиги санаб ўтилган бўлиб, уларнинг ҳар бири илмий асосланган.

Улар орасида, хусусан, узоқ умр кўришга кўмаклашиш, ичак фаолиятини қўллаб-қувватлаш, озишга кўмаклашиш ва сурункали касалликлар хавфини камайтириш бор.

The Journal of Nutrition журналида чоп этилган тадқиқот шуни кўрсатдики, ҳар куни бир финжондан уч финжонгача кофеинли қора қаҳва истеъмол қилиш ўлим ва юрак-қон томир касалликлари хавфини камайтириши мумкин.

1. Қаҳва узоқроқ яшашга ёрдам бериши мумкин

Олимларнинг аниқлашича, кунига камида бир финжон кофеинли қаҳва ичган одамларда барча сабаблар, жумладан, юрак-қон томир касалликларидан ўлим хавфи 16 фоизга, икки-уч финжон қаҳва ичганларда эса 17 фоизга камайган. Бироқ, озгина шакар ва сут ёки қаймоқ қўшиш бу афзалликларни бироз пасайтиради: бундай ҳолда ўлим хавфи атиги 14 фоизга камайди. Бироқ, нашр таъкидлаганидек, бу тадқиқот чекловларга эга ва якуний эмас, уни тавсиявий деб ҳисоблаш керак.

2. Қаҳва ичакни қувватлаши мумкин

Қаҳва ичак микробиомини - микроблар жамоасини қўллаб-қувватлаши мумкин. Biotechnology and Genetic Engineering Reviews журналида чоп этилган тадқиқот шуни кўрсатдики, қаҳва ичадиган одамларда (оддий ва кофеинсиз) хинин кислотаси даражасини оширадиган ичак бактерияси Lawsonibacter asaccharolyticus миқдори юқори бўлади. Бу антиоксидант оксидланиш стресси ва яллиғланишни камайтиришга ёрдам беради. Қаҳва таркибидаги полифеноллар пребиотик таъсир кўрсатиб, фойдали ичак бактерияларининг кўпайишига ёрдам бериши мумкинлиги қайд этилган. Турли-туман ичак микробиоми, ўз навбатида, ичакнинг мунтазам равишда бўшашига ёрдам беради.

3. Қаҳва озишга ёрдам бериши мумкин

Қаҳва вазн йўқотиш учун мустақил восита сифатида, албатта, натижа бермайди, аммо у метаболизмни яхшилаши мумкин. Бу ичимлик, айниқса, кўпроқ калорияларни ёқишга ёрдам беради. Journal of Endocrinology журналида чоп этилган тадқиқотга кўра, қаҳва ичгандан сўнг уч соат ичида метаболизм 5-20 фоизга тезлашади. Шунингдек, қаҳва ёғларнинг парчаланишини кучайтиради, айниқса тана вазни кам бўлган одамларда. Бундан ташқари, у иштаҳани пасайтиради: бир тадқиқот натижаларига кўра, овқатдан олдин қаҳва ичилса, эркаклар учун истеъмол қилинадиган калория миқдорини тахминан 20 фоизга камайтириш мумкин, аммо аёллар учун эмас.

4. Қаҳва сурункали касалликлар хавфини камайтиради

Мунтазам равишда қаҳва ичиш юракни ҳимоя қилиши ва сурункали касалликлар хавфини камайтириши мумкин. Нашр қаҳва фойдали бўлиши мумкин бўлган ҳолатлар орасида Паркинсон касаллиги, 2-тур қандли диабет, инсульт ва юрак етишмовчилигини санаб ўтган.

Эслатиб ўтамиз, саломатлик ҳақидаги хабарлар тавсиявий хусусиятга эга. Муҳим қарор қабул қилишдан олдин шифокор билан маслаҳатлашинг.