Трамп тиббий кўрикдан ўтди: унга озиш тавсия қилинди

АҚШ президенти Доналд Трамп ҳар йилги тиббий кўрикдан ўтди ва унинг соғлиғи аъло даражада деб баҳоланмоқда. Шу билан бирга, Оқ уй раҳбарига жисмоний машқларга кўпроқ эътибор қаратиш ва ортиқча вазндан халос бўлиш тавсия этилган.

Оқ уй жума куни эълон қилган тиббий хулосада президентнинг шахсий шифокори, капитан Шон Барбабелла томонидан ёзилишича, келаси ой 80 ёшга тўладиган Трампнинг «юрак-қон томир, нафас олиш, неврологик ва умумий жисмоний функциялари яхши». Хулосада у бош қўмондон ва давлат раҳбарининг барча вазифаларини бажаришга тўлиқ яроқли экани айтилган.

Сешанба куни Трамп тиббий кўрикдан ўтиш учун Уолтер Рид номидаги Миллий ҳарбий-тиббиёт марказига келди ва тиббий кўрикдан ўтиб бўлганидан кейин Truth Social платформасидаги саҳифасида ўзи билан «барчаси жойида экани» ҳақида ёзди.

Бу Трамп ўтган йил Оқ уйга қайтганидан буён учинчи бор тиббий кўрикдан ўтиши бўлди.

Хулосага кўра, Трамп (АҚШ президенти лавозимидаги энг кекса ёшли одам) когнитив функцияларни баҳоловчи Монреал шкаласи бўйича 30 баллдан 30 балл тўплаб, «меъёр доирасида»ги натижани кўрсатган.

Бундан ташқари, Трампнинг юрагининг ҳолати 14 ёшга кичикроқ кишиларнинг кўрсаткичига мос келади, дея тасдиқлаган Барбабелла.

Шу билан бирга, Трампнинг вазни 108 кг чиққан, яъни 2025 йил апрел ойида охирги бор тиббий кўрикдан ўтганидан бери у 6,3 кг вазн тўплаган. Барбабелланинг айтишича, президентга овқатланиш, жисмоний фаоллик ва вазнни янада камайтириш бўйича тавсиялар берилган.

«Юқори даражадаги кўплаб учрашувлар, оммавий тадбирлар ва мунтазам жисмоний фаолликни ўз ичига олган кунлик жадвали унинг умумий саломатлигига таъсир қилишда давом этмоқда», – деб ёзади шифокор.

Ўтган йили Трампнинг қўлларидаги кўкаришлар ва оёқларидаги шишлар унинг соғлиғи ҳақида хавотир ва тахминларни келтириб чиқарганди.

Июл ойида унга сурункали веноз етишмовчилиги ташхиси қўйилгани маълум бўлди, бу қон димланиши ва болдирлар шишишига олиб келадиган касалликдир.

Қўлдаги кўкариш сабаби нимада?

Давосда бўлиб ўтган Жаҳон иқтисодий форумида сўзга чиққан Трампнинг қўлида кўкарган жойни пайқашганди.

«Болдирлардаги кичик шиш» сақланиб қолган бўлса-да, президентда ўтган йилга нисбатан яхшиланиш кузатилмоқда, дея қайд этган Барбабелла ўз ҳисоботида.

Шифокор Трампнинг қўлларидаги кўкаришларни «юрак-қон томир касалликларининг олдини олиш» учун аспирин қабул қилиш фонида «тез-тез қўл сиқиш билан боғлиқ бўлган юмшоқ тўқималарнинг бироз таъсирланишига мос келади» деб таърифлади.

Барбабелла бу кўкаришлар «аспирин терапиясининг одатий ва хавфсиз эффекти» эканини қайд этган.

Унинг хулосасида айтилишича, Трамп холестерин даражасини назорат қилиш учун аспириндан ташқари яна иккита препарат қабул қилади. Шунингдек, у барча зарур профилактик кўриклар ва эмлашлардан ўз вақтида ўтказилади.

Аввалроқ Трамп сўнгги 25 йил давомида аспиринни тавсия этилган миқдордан ортиқ қабул қилганини айтганди.

У Wall Street Journal газетасига берган интервюсида шифокорлар баъзан тавсия қиладиган 81 мг ўрнига кунига 325 мг аспирин қабул қилишини, чунки қони қуюқлашишини хоҳламаслигини айтган.

Трамп, шунингдек, голф ўйнашдан ташқари ҳеч қандай мунтазам жисмоний машқлар билан шуғулланмасликни афзал кўришини билдирган.

«Бу менга ёқмаяпти. Бу зерикарли. Баъзи одамлар каби югуриш йўлакчасида соатлаб юриш ёки югуриш мен учун эмас», – дейди у.

Гарчи бундай йиллик тиббий кўриклар мажбурий бўлмаса-да, сўнгги ўн йилликларда улар АҚШ президентлари учун одатий жараён ҳисобланади.

2021 йилда лавозимга киришганида 78 ёшда бўлган собиқ президент Жо Байденнинг соғлиғи муддати тугаётганда жамоатчиликнинг диққат марказида бўлганди.