Ўта бой аҳоли сони энг тез ўсган давлат маълум бўлди

2026 йилда дунёдаги ўта бой инсонларнинг асосий қисми АҚШ ва Хитойда яшамоқда. Бу икки давлат ҳиссасига жаҳондаги барча ўта бой шахсларнинг қарийб 55 фоизи тўғри келади.

Knight Frank компаниясининг Wealth Report 2026 ҳисоботига кўра, ўта бой аҳолининг мамлакатлар бўйича тақсимоти ҳануз жуда нотекис бўлиб қолмоқда.

Рейтингда АҚШ биринчи ўринни эгаллаган. Мамлакатда 250 мингдан ортиқ ўта бой инсон яшайди. Бунга кучли фонд бозори, ривожланган стартап экотизими, йирик халқаро корпорациялар концентрацияси ва глобал инвестиция бозорларига кенг кириш имконияти сабаб бўлган.

Иккинчи ўринда Хитой жойлашган бўлиб, у ерда қарийб 122 минг нафар ўта бой фуқаро истиқомат қилади. Мамлакат иқтисодиёти ўсиш суръатлари аввалгидек юқори бўлмаса-да, тадбиркорлик ва инвестиция капитали манбаларидан бири бўлиб қолмоқда.

Германия, Буюк Британия ва Франция эса рейтингнинг биринчи бешлигини якунлаган. Бу Европа ҳануз йирик хусусий капитал тўпланган муҳим ҳудудлардан бири эканини кўрсатади.

Сўнгги йиллардаги энг диққатга сазовор ўзгаришлардан бири Ҳиндистоннинг тез юксалиши бўлди. Агар 2021 йилда мамлакат рейтингда 10-ўринда бўлган бўлса, 2026 йилга келиб 6-ўринга кўтарилди. Бугунги кунда Ҳиндистонда қарийб 20 минг нафар ўта бой инсон яшайди.

Россия рейтингда 13-ўринни эгаллаган бўлиб, мамлакатда тахминан 8,5 минг нафар ўта бой аҳоли мавжуд.

Тадқиқот муаллифлари қайд этишича, миллионер ва миллиардерлар сонининг энг тез ўсиши ривожланаётган иқтисодиётларда кузатилмоқда. Айниқса, Польша сўнгги беш йилда энг юқори натижани қайд этган — мамлакатда ўта бой аҳоли сони 109 фоизга ошган.

Шунингдек, Бирлашган Араб Амирликлари, Саудия Арабистони, Вьетнам ва Индонезияда ҳам йирик капитал эгалари сони жадал суръатларда кўпаймоқда.