Трамп Венесуэладаги наркокартел раҳбари ўлдирилганини эълон қилди

Венесуэладаги «Трен де Арагуа» наркокартели раҳбари америкалик ҳарбийлар томонидан ўтказилган махсус ҳарбий амалиёт натижасида ўлдирилди. Бу ҳақда АҚШ президенти Доналд Трамп маълум қилди.

«Менинг буйруғимга кўра, Қўшма Штатларнинг Жанубий қўмондонлиги Ер юзидаги энг қонхўр террорчи ташкилотлардан бири бўлган „Тренд де Арагуа“ етакчиси Нино Геррерони қатл этиш учун тезкор ва ҳалокатли зарба берди», – деб ёзди Трамп ўзининг Truth ижтимоий тармоғида.

Унинг таъкидлашича, ушбу наркобароннинг ўлдирилиши «12 ёшли Жоселин Нунгарай, 22 ёшли Лейкен Рейли ва бошқа кўплаб ёш қизлар учун қасос бўлган».

Нино Герреро (тўлиқ исми – Эктор Растенфорд Герреро Флорес)ни йўқ қилиш бўйича амалиёт Венесуэла ҳарбийлари билан мувофиқлаштирилган. Венесуэла қўшма амалиёт ўтказилганини тасдиқлаган.

Трамп наркокартелларга қарши кураш ўз сайловолди дастурининг асосий бандларидан бири бўлгани ва ваъдаларини бажариб, президентликка қайтиши билан «Тренд де Арагуа»ни террорчилик ташкилотлари рўйхатига киритганини эслатди.

2009 йилда ташкил этилган «Тренд де Арагуа» картели Венесуэладаги энг йирик жиноий тузилмалардан бири саналган. Бу гуруҳ қотилликлар содир этиш, талончилик, гиёҳванд моддалар ҳамда одам савдоси, пул ювиш, жинсий эксплуатация ва одам ўғирлаш билан шуғулланган. Унинг сафларида етти мингга яқин аъзоси борлиги айтилади.

«Тренд де Арагуа» билан ҳамкорлик қилиш – АҚШ ҳукумати Венесуэла собиқ президенти Николас Мадурога қарши илгари сурган айблов бандларидан бири бўлганди. 2026 йил январида Америка махсус топшириқли кучлари мазкур айблов асосида Венесуэлада амалиёт ўтказиб, Мадуро ва унинг рафиқасини қўлга олган ҳамда уларни АҚШга олиб кетганди.