Зеленский Путинга G7 саммитида учрашув ўтказишни таклиф қилди

Зеленский бу ҳақда 15 июн куни Киевда журналистлар билан мулоқот чоғида маълум қилди. Унинг сўзларига кўра, G7 саммити Россия ва Украина раҳбарларининг учрашуви учун қулай майдон бўлиши мумкин эди, чунки унда АҚШ президенти Доналд Трамп, Франция президенти Эммануэл Макрон ва бошқа ғарб давлатлари етакчилари иштирок этмоқда.

Украина раҳбари Россия президенти билан Европа ва АҚШ вакиллари иштирокида очиқ мулоқот ўтказиш мумкинлигини таъкидлаб, бу можарони дипломатик йўл билан ҳал этиш имкониятларини муҳокама қилиш учун яхши фурсат бўлганини қайд этди.

Зеленскийнинг фикрича, ғарб давлатлари мазкур учрашув ғоясини қўллаб-қувватлаган, аммо Россия яна бир бор тўғридан тўғри мулоқотга тайёр эмаслигини намоён қилган.

Украина оммавий ахборот воситалари эса мазкур таклиф Кремлга турли каналлар орқали — дипломатлар, воситачилар ва махсус хизматлар орқали етказилганини хабар қилди. Манбаларга кўра, Москва томонидан аниқ розилик ёки рад жавоби берилмаган. Россия президенти ёрдамчиси Юрий Ушаков эса учрашувни Москвада ўтказиш мумкинлигини билдирган.

Шу билан бирга, Зеленский Россиянинг Украинага қарши навбатдаги оммавий ракета ва дрон ҳужумларини ҳам тилга олди. Унинг маълум қилишича, 15 июнга ўтар кечаси Украина бўйлаб 70 та ракета ва 611 та дрон учирилган. Фақат Киевнинг ўзига 60 дан ортиқ ракета йўналтирилган.

Сўнгги маълумотларга кўра, ҳужумлар оқибатида Киевда камида тўрт киши ҳалок бўлган, 28 нафар фуқаро жароҳат олган. Шунингдек, XI асрда барпо этилган ва ЮНЕСКО мероси рўйхатига киритилган Киев-Печерск лаврасининг Успенский соборида ёнғин чиққан.

Украина президенти G7 давлатларидан Россиянинг ҳаракатларига нисбатан қатъий муносабат билдиришни кутаётганини айтди. Унинг таъкидлашича, Киев Москвага босимни кучайтириш ва ҳаво ҳужумидан мудофаа тизимларини мустаҳкамлаш бўйича қўшимча ёрдам олишдан умид қилмоқда.