Талон-торож ва фирибгарлик учун “чиқиш эшиклари” торайди

Ўзбекистон президенти 22 июн куни имзолаган қонун билан, Жиноят кодексига ўзгартишлар киритилди.

Унга кўра, бундан буён ўзлаштириш ёки растрата қилиш йўли билан талон-торож қилганлик, шунингдек фирибгарлик учун ҳукм қилинган ва содир этган жинояти туфайли етказилган зарарнинг ўрнини тўлиқ қопламаган шахслар жазодан муддатидан илгари шартли равишда озод қилинмайди.

Бундан ташқари, бу икки жиноятни лавозим мавқейидан фойдаланиб содир қилганлик учун жазо оғирлаштирилди:

• Ўзлаштириш ёки растрата йўли билан талон-торож қилиш жинояти мансаб мавқейини суиистеъмол қилиш йўли билан содир этилган бўлса, илгари кўпи билан 5 йилгача озодликдан маҳрум қилиш жазоси белгиланган эди. Эндиликда бундай қилмиш 10 йилгача озодликдан маҳрум қилиш билан жазоланади.
• Хизмат мавқейидан фойдаланган ҳолда фирибгарлик қилганлар учун эса илгари максимал 8 йилгача озодликдан маҳрум қилиш жазоси берилган. Эндиликда бу қилмишни содир этган шахслар 10 йилгача озодликдан маҳрум қилинади.

Янги қонун расмий эълон қилинган кун – 23 июндан кучга кирди.

Қайд этиш лозим, Жиноят кодексида белгиланган: “Етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди” деган қоида талон-торож жиноятлари (167-модда) учун ҳам, фирибгарлик жиноятлари (168-модда) учун ҳам сақлаб қолинган.

Бу қоида тез-тез муҳокамаларга сабаб бўлиб туради. Хусусан, охирги марта “Тошшаҳартрансхизмат” АЖнинг собиқ раиси давлат мулкини талон-торож қилишда айбдор деб топилиб 7,5 йилга қамалган, лекин кўп ўтмай, етказилган зарар қопланганидан кейин, жазо юмшатилиб, озодликка чиқарилган эди.