Ўзини бош прокуратура ходими деб таништирган шахс миллиардлаб сўмлик фирибгарликда гумонланмоқда

Бош прокуратура шахсий хавфсизлик бошқармаси томонидан ўтказилган тезкор тадбирда ўзини прокуратура ходими сифатида таништириб келган шахс қўлга олинди. Бу ҳақда бош прокуратура ахборот хизмати хабар берди.

Тергов маълумотларига кўра, А.А. исмли шахс фуқаролар Б.М. ва С.Ш.га арзон нархда буғдой сотиб олиб, уни қайта ишлаш орқали юқори даромад олиш мумкинлигини айтган. Шу тариқа уларнинг ишончига кирган гумонланувчи 1,7 млрд сўм маблағни фирибгарлик йўли билан қўлга киритган.

Шунингдек, у тадбиркор М.Т.га тегишли компанияга Тошкент шаҳрининг Яккасарой туманида жойлашган 50 сотих ер майдони бўйича бекор қилинган қарорни қайта тиклаб беришни ваъда қилиб, 95 минг АҚШ долларини олгани айтилмоқда.

Бош прокуратура маълумотига кўра, А.А. ижтимоий тармоқлар орқали ҳам фуқароларнинг ишончига кирган. Жумладан, у фуқаро И.Н.га прокуратурада ишлашини айтган ҳолда, 2014 йилда ишлаб чиқарилган Cobalt автомашинасини янги Gentra автомобилига алмаштириб беришни ваъда қилган. Натижада автомашинани эгаллаб, уни бошқа шахсга сотиб юборган ва тушган маблағни шахсий эҳтиёжлари учун сарфлаган.

Терговда аниқланишича, гумонланувчи яна бир фуқаро - А.К. билан яқин муносабат ўрнатган. Кейинчалик унинг хонадон калити нусхасини қўлга киритиб, уй эгаси саёҳатда бўлган вақтда хонадонга кирган ва кўп миқдордаги тилла тақинчоқларни ўғирлаб кетган.

2026 йил 18 июнь куни А.А.га нисбатан Жиноят кодексининг фирибгарлик, ўғирлик ва бошқа моддалари билан айблов эълон қилинган. Унга нисбатан қамоқ эҳтиёт чораси қўлланилган.

Бош прокуратура мазкур шахс бошқа фуқароларга ҳам зарар етказган бўлиши мумкинлигини билдириб, жабрланганлар ёки бу ҳақда маълумотга эга шахсларни «1161» ишонч телефони орқали мурожаат қилишга чақирган. 

Аввалроқ Қашқадарёда ҳам “сохта прокурор” қўлга олинганди.