Япония футболининг буюк сабоғи: мағлубиятдан тўғри хулоса чиқариш

Япониянинг 85 ёшли фуқароси 1998 йилги Жаҳон чемпионатида миллий жамоа барча учрашувда мағлуб бўлганини эслар экан, айнан ўша мағлубият мамлакат футболининг юксалишига асос бўлганини таъкидлади. Унинг фикрича, энг катта ютқазиш майдонда эмас, балки мағлубиятдан сабоқ чиқармасликдир.

Фото: Видеодан кадр

Япониялик отахоннинг ўзбекистонлик Баҳодир Искандаровга айтишича, 1998 йилда миллий терма жамоа илк бор Жаҳон чемпионатида иштирок этган ва гуруҳ босқичидаги барча учрашувларда мағлубиятга учраган. Аммо футбол раҳбарлари бу натижани фожиа сифатида эмас, балки ўзгаришлар учун муҳим сабоқ сифатида қабул қилган.

Унинг сўзларига кўра, шундан кейин Японияда футболни ривожлантириш бўйича узоқ муддатли стратегия ишлаб чиқилган. Болалар футболига алоҳида эътибор қаратилган, мураббийлар тайёрлаш тизими кучайтирилган, мактаб футболи ва профессионал лига ривожлантирилган.

«Японияда бир мақол бор: “Етти марта йиқилсанг ҳам, саккизинчи марта тур”. Улар ҳам шундай қилди. Энг муҳими, шошилмади. Дарахт бугун экилиб, эртага мева бермаслигини яхши биларди», — дейди у.

Отахоннинг таъкидлашича, Жаҳон чемпионатидаги энг катта мағлубият 0:5 ёки 0:7 ҳисобида ютқазиш эмас, балки мағлубиятдан кейин ўрганишни тўхтатишдир.

«Ютганингда камтар бўл, ютқазганингда эса сабрли бўл», — дея хулоса қилади у.

Маълумот учун, Япония миллий жамоаси 1998 йилдан кейин кетма-кет етти марта Жаҳон чемпионати йўлланмасини қўлга киритди. Уларнинг бештасида гуруҳ босқичидан чиқишга муваффақ бўлди.

Жорий мундиалда Япония Нидерландия билан 2:2, Швеция билан 1:1 ҳисобида дуранг ўйнади, Тунисни эса 4:0 ҳисобида мағлуб этди. Терма жамоа гуруҳда иккинчи ўринни эгаллаб, плей-оффга йўл олди ва энди Бразилияга қарши баҳс олиб боради.