“Фарҳод” автоэҳтиёт қисмлар бозоридаги жиноий гуруҳ аъзоларига ҳукм ўқилди

Тошкент шаҳрида товламачилик билан шуғулланиб келган 14 киши турли муддатларга озодликдан маҳрум қилинди. Улар автоэҳтиёт қисмлар бозорида мижозларнинг машинасига рухсатсиз ва олдиндан келишмаган ҳолда турли жиҳозлар ўрнатиб, товламачилик йўли билан пул ундириб келишган. 

Учтепа туманининг Фарҳод кўчасида жойлашган автомобил эҳтиёт қисмлари бозорида жиноий гуруҳ ташкил қилган 14 кишига суд ҳукми ўқилди. Бу ҳақда суд мажлисида қатнашган Kun.uz мухбири хабар берди.

Тергов ва суд ҳужжатларига кўра, жиноий гуруҳ аъзолари мижозларнинг машинасига олдиндан келишмаган ҳолда турли жиҳозлар ўрнатиб, товламачилик йўли билан пул ундиришга уринишган.

Шундай ҳолатларнинг бирида улар мижознинг машинасига унинг рухсатисиз турли жиҳозлар ўрнатишган. Ушбу хизмат бозор нархида 600 доллар бўлган. Бироқ судланувчилар мижоздан 13 300 долларни товламачилик йўли билан ундирган. Эътироз билдирган мижозга қўрқитиш йўли билан таҳдид қилишган.

Яна бир ҳолатда жиноий гуруҳ аъзолари бошқа бир фуқаронинг автомашинасига унинг розилигисиз эҳтиёт қисмларни ўрнатиб, ундан 3 баробар қиммат нархда пул талаб қилишган. Аниқланишича, улар автомашина калитини фуқародан олиб қўйиб, тазйиқ ўтказиш орқали 15 млн сўм ундиришган.

Бундан ташқари, қонунбузарлар яна 2 нафар фуқаронинг автомашинасини қўшимча эҳтиёт қисмлар билан жиҳозлаш учун улардан 70 млн сўм миқдорида пул олиб, ваъда қилинган ишни бажармаган.

ЖИБ Учтепа тумани суди ҳукми билан судланувчилар товламачилик жиноятини содир қилишда айбли деб топилди. Уларга 3 йилдан 6,5 йилгача бўлган муддатга озодликдан маҳрум қилиш жазослари тайинланди. 

Айрим судланувчилар (муқаддам судлангани боис) тайинланган жазони қаттиқ тартибли, айримлари эса умумий тартибдаги жазо колонияларида ўташи белгиланди.