ЖЧ кундалиги. Мбаппе Мессини таъқиб қилмоқда

2026 йилги жаҳон чемпионатида плей-офф учрашувлари давом этмоқда. 30 июн куни кечқурун ва 1 июлга ўтар кечаси яна учта учрашув ўтказилди – Норвегия Кот-д'Ивуар тўсиғидан ўтди (2:1), Франция Швецияни тор-мор этди (3:0), Мексика эса Эквадорни (2:0) мағлуб этди.

Норвеглар эшкак эшишда давом этмоқда

Кот-д`Ивуар – Норвегия 1:2
Голлар: Нуса, 39 (0:1). Диалло, 74 (1:1). Ҳоланд, 86 (1:2)
Кот-д`Ивуар: Фофана, Коссуну, Агбаду, Конан (Гессан, 90+3), Дуэ, Сангаре, Кессе, Оулаи (Ваи, 60), Диоманде (Туре, 90+3), Пепе (Диаките, 87), Бонни (Диалло, 60)
Норвегия: Нюланн, Айер, Ҳеггем, Волфе, Педерсен (Эурснес, 83), Берге, Берг, Эдегор, Нуса (Бобб, 71), Сёрлот (Шелдеруп, 71), Ҳоланд
Огоҳлантириш: Нуса, 45

1/16 финалда Кот-д'Ивуар билан ўйнашдан олдин Норвегия гуруҳ босқичининг 3-турида Францияга йирик ҳисобда ютқазганди (1:4). Лекин скандинавларнинг бу муваффақиятсизлигига мураббий ўйинга тўлиқ иккинчи таркибни туширгани сабаб бўлди, у энди бу қарори тўғри бўлганини исботлаши талаб этиларди.

Қайсидир маънода бу қурбонлик ўзини оқлади – танаффус арафасида Антонио Нуса Мартин Эдегорнинг узатмасини голга айлантириб, Норвегияни ҳисобда олдинга олиб чиқди. Аммо иккинчи бўлим ўрталарида африкаликлар мувозанатни тиклашди – Амад Диалло ўнг қанотдан рейд уюштириб, ҳимоячилар ва дарвозабонни доғда қолдирди.

Ўйин сценарийси яна қўшимча бўлимлар ва пеналтилар серияси (плей-оффда аллақачон иккита ўйинда шундай бўлганди) ваъда қилаётганди. Аммо Эрлинг Ҳоланд ортиқча ярим соат ўйнашни истамади ва ўйин якунланишига оз вақт қолганида норвегларга ғалаба келтирувчи голни урди.

Унинг голи олдинги икки гол каби чиройли чиқмади, чунки у бўш дарвоза қаршисида тўпга шунчаки тегиниб қўйиши етарли бўлди, лекин айнан шу гол скандинавлар тарихда илк бор жаҳон чемпионати 1/8 финалида ўйнашини таъминлади, кейинги босқичда жамоани Бразилияга қарши ўйин кутмоқда.

«Мен ўзига хос бирдамликни ҳис қиляпман, бу одамга қаттиқ таъсир қилади. Биз бу саёҳатдан завқ оляпмиз», – дея хурсандчилигини журналистлар билан бўлишган Ҳоланд.

Мбаппе ва жамоаси учун енгил сайр

Франция – Швеция 3:0
Голлар: Мбаппе, 45 (1:0). Барколя, 53 (2:0). Мбаппе, 74 (3:0)
Франция: Менян, Упамекано, Салиба, Дин (Эрнандез, 78), Кунде (Гюсто, 75), Тчуамени, Рабио, Олисе (Шерки, 85), Барколя, Дембеле (Дуэ, 75), Мбаппе (Матета, 85)
Швеция: Сеттерстрем, Лагербилке, Линделеф, Гудмундссон, Свенссон (Сванберг, 82), Бергвалл (Зенели, 65), Айяри (Нюгрен, 82), Строуд (Али, 65), Эланга, Исак (Нилссон, 89), Йокереш

Французлар гуруҳ босқичи биринчи турида Сенегалга қарши кечган ўйиннинг (3:1) биринчи бўлимини ҳисобга олмаса, турнирда умуман рақобат ҳис қилмаяпти. 1/16 финалда Швецияга қарши ўйин ҳам шундай бўлди.

Диде Дешам шогирдлари биринчи бўлимда тўлиқ устунликка эришди: Килиан Мбаппе офсайддан гол урди, Олисе исталган нуқтадан туриб зарба берди ва бир марта «қайчи» услубидаги зарбаси билан тўпни устунга теккизди. Бўлим охирига келиб «Реал» форварди жарима майдони бурчагида тўпни қабул қилиб олди ва бир неча рақибни алдаб ўтиб, дарвозани ишғол этди. Шундан кейин яқинда онасини йўқотган мураббийининг олдига чопди.

Танаффусдан кейин ўйин картинаси ўзгармади. Иккинчи бўлим бошидаёқ Брэдли Барколя ҳисобдаги устунликни оширди, Мбаппе эса дублни расмийлаштирди ва турнир тўпурарлари рўйхатида биринчи ўринга етиб олди: энди Килианда ҳам бу босқич ўйинини ҳали ўтказмаган Лионел Мессиники каби олтита гол бор. Бундан ташқари, у барча жаҳон чемпионатларида урилган голлар сони (18) бўйича ҳам аргентиналик ҳужумчини (19) таъқиб этмоқда.

1/8 финалда Франция Парагвайга қарши ўйнайди. Швеция эса F гуруҳининг қолган вакиллари ортидан турнирдаги иштирокини эрта якунлади: бунгача Япония Бразилияга (1:2), Нидерландия Марокашга ютқазганди (1:1, пеналтилар сериясида 2:3).

Мексика 40 йиллик тавқи лаънатни бекор қилди

Мексика – Эквадор 2:0
Голлар: Кинионес, 22 (1:0). Р. Хименес, 31 (2:0)
Мексика: Ранҳел, Монтес, Васкес, Галярдо, Санчес, Лира, Ромо (Варгас, 73), Мора (Гутеррес, 58), Кинионес (Рейес, 80), Алварадо (Пинеда, 80), Р. Хименес (С. Хименес, 74)
Эквадор: Галиндес, Ордонес (Пресиадо, 46), Пачо, Инкапие, Франко (Медина, 46), Вите, Мой. Кайседо, Ангуло (Паэс, 79), Йебоа (Х. Кайседо, 79), Валенсия (Родригес, 59), Плата
Огоҳлантиришлар: Франко, 45. Паэс, 90. Мой. Кайседо, 90
Четлатиш: Инкапие, 90

Мексика мезбонлик имтиёзидан аъло тарзда фойдаланмоқда. Жамоа гуруҳ босқичида ўз фанатлари қаршисида кечган ўйинларда учта ғалабага эришган ва бу ўйинларда бирорта гол ўтказиб юбормаганди. 1/16 финалда гуруҳ босқичининг сўнгги турида қаҳрамонлик кўрсатиб, Германияни мағлуб этган ва плей-оффга чиққан Эквадор кутаётганди.

Ўйин бошланиши ноқулай об-ҳаво туфайли бир соатга кечикди. Аммо шундай ҳаво туфайли ўйинда сув ичиш учун танаффус ва тўхталиш ҳам бўлмади. Ўйин бошланганида жанубий америкаликлар Германия билан ўша ўйинда катта куч сарфлаб юборгани ойдинлашди. Мексика 30-дақиқага келиб икки гол фарқи билан олдинга чиқиб олганди: Ҳулиан Кинионес ва Раул Ҳименес бир-биридан чиройли голлар муаллифига айланишди.

Ўйиннинг қолган қисмида мезбонлар эквадорликларга олдинги чизиқда ҳеч қандай имконият беришмади ва жаҳон чемпионати плей-офф босқичларида сўнгги 40 йил ичида илк ғалабасига эришди. «Ацтека» ўйингоҳини тўлдириб ўтирган мухлислар 80-дақиқадаёқ ғалабани нишонлай бошлашди.

Ўйинга қўшиб берилган дақиқаларда эса эквадорликлар ҳимоячиси Пиеро Инкапие ҳам футболга киритилган янги қоидадан жабрланди – у мексикаликлар ҳужумчиси Сантияго Ҳименес билан гаплашаётганида оғзини қўли билан тўсди ва рақиб дарҳол ҳакамларни бунга эътибор қаратишга чақирди. Бош ҳакам Славко Винчич эса монитор қаршисига бориб, вазиятни кўриб чиқди ва «Арсенал» футболчисини майдондан четлатди.

Бу турнирда шу каби ҳолат учун берилган иккинчи қизил карточка бўлди – гуруҳ босқичида Парагвай ҳужумчиси Мигел Алмирон ҳам Туркия билан ўйинда худди шундай ҳаракат учун жазоланганди.

1/8 финалда Мексика 5 июл куни Мехикода Англия – Конго ДР жуфтлиги ғолибига қарши майдонга чиқади.

Куман истеъфога чиқди

Нидерландлар жаҳон чемпионатида яна муваффақиятсизликка учради – жамоа 1/16 финалдаёқ Марокашга ютқазди (1:1, пеналтилар сериясида 2:3). «Тўқсариқранглилар» жамоаси фанатлари орасида ўйиндан кейин дарҳол Роналд Куман истеъфоси ҳақида хабарлар пайдо бўлганди. Мутахассиснинг ўзи аввалига келажаги борасида хотиржам эканини айтганди, аммо якунда истеъфога чиқди.

«Кеча тунда Нидерландия миллий жамоаси бош мураббийи лавозимидаги фаолиятимни якунлашга қарор қилдим. Ишим шундай якунлангани аламли. Ҳаммамиз тарихга киришимиз мумкин бўлган жаҳон чемпионатини орзу қилардик. Афсуски, бундай бўлмади. Бу натижадан мендан кўра кўпроқ ҳафсаласи пир бўлган одам йўқ. Бош мураббий сифатида натижа учун мен жавобгарман. Мен ҳар доим бу масъулиятни ҳис қилганман ва доимо ҳис қиламан», – дея ёзди 63 ёшли мутахассис баёнотида.

Бу жаҳон чемпионатида қатнашган жамоаларда бешинчи истеъфо бўлди: Тунис гуруҳ босқичининг биринчи туридан кейиноқ Сабри Лямушига жавоб берганди. Гуруҳ босқичи якунланганидан кейин Ҳен Мен Бо (Жанубий Корея), Стив Кларк (Шотландия) ва Мирослав Коубек (Чехия) ҳам истеъфога чиқди. Бундан ташқари, Уругвай билан жиддий муваффақиятсизликка учраган Марсело Биелсанинг ҳам курсиси қимирлаб қолган. Шунингдек, Саудия Арабистони футбол федерацияси президенти Ёсир Ал-Мишал қониқарсиз натижа туфайли (гуруҳда 2 очко билан охирги ўрин) истеъфо берган.

Америкаликлар Эрон чиқиб кетганидан хурсанд

АҚШ ички ишлар вазири Марквейн Маллин Эрон турнирни тарк этганидан хурсанд эканини яширмади. Ушбу мулозим бу натижадан кейин ҳиссиётларига эрк берганини айтган.

«Улар учиб кетганидан ва қайтиб келмаслигидан мамнунман. Уларнинг визаларини қайтариб олиб, АҚШ ҳудудини тарк этишлари мумкинлигини айтганимизда хурсанд бўлдим. Бир-иккита қўшиқ айтиб, қувончдан рақсга тушган бўлсам ҳам керак... Бу турнирда улардан кўра кўпроқ муаммоли бўлган бирорта жамоа йўқ эди», – дея қайд этган Маллин.

АҚШ ва Эрон бир неча ойдан буён уруш ҳолатида, шу туфайли томонларнинг футбол соҳасидаги муносабатлари ҳам кескинликни сақлаб қолаётганди.

Навбатдаги ўйинлар

Жаҳон чемпионати плей-офф босқичи давом этмоқда — 1 июл куни кечқурун ва 2 июлга ўтар кечаси қуйидаги учрашувлар ўтказилади:

21.00. Англия – Конго ДР
01.00. Белгия – Сенегал
05.00. АҚШ – Босния ва Ҳерцеговина