ЖЧда 6-кун. Месси ва Мбаппеда рекордлар, корейслар базасида можаро, немислар базасида илон

Жаҳон чемпионатининг навбатдаги кунида сюрпризлар бўлмади. Франция биринчи бўлимни нурсиз ўтказганига қарамай, барибир Килиан Мбаппенинг дубли эвазига Сенегални таслим этди (3:1). Кейин эса Эрлинг Ҳоланд етакчилигидаги норвегияликлар Ироққа ҳеч қандай имконият қолдиришмади (4:1), ундан кейин Аргентина Жазоир билан ўйинда Мессининг голлари эвазига йирик ҳисобда ғалаба қозонди (3:0), Австрия эса Иорданияни мағлуб этди (3:1).

Майдон ташқарисида ҳам қизиқарли воқеалар бўлиб ўтмоқда: Тунис янги бош мураббийга эга бўлди, кореяликлар журналистларга бойкот эълон қилди, инглизлар ва ўзбекистонликлар ўйинга бир кун қолганида якуний таркибдаги футболчиларини алмаштиришди.

Ҳоланд жаҳон чемпионатида дебют қилди

Ироқ – Норвегия 1:4
Голлар: Ҳоланд, 29 (0:1). Ҳусайн, 39 (1:1). Ҳоланд, 43 (1:2). Эстигор, 76 (1:3). Ҳусайн, 90+6 – автогол (1:4)
Ироқ: Жалол, Таҳсин, Ҳошим, Доски, Али (Саадун, 73), Ал-Аммарий, Исмоил (Фаржи, 59), Ясим (Қосим, 73), Байеш (Муҳанад, 78), Ал-Ҳамади (Иқбол, 59), Ҳусайн
Норвегия: Нюланн, Айер, Ҳеггем, Волфе (Эстигор, 73), Рюэрсон, Берге, Эурснес (Торстведт, 73), Нуса (Бобб, 73), Эдегор (Берг, 81), Сёрлот (Шелдеруп, 73), Ҳоланд
Огоҳлантириш: Таҳсин, 86

Ироқ ва Норвегия жуфтлиги фаворит аниқ эди. Гарчи икки жамоа ҳам жаҳон чемпионатига узоқ танаффусдан кейин (мос равишда 1986 ва 1998 йиллар) қайтган бўлса-да, таркиблар борасидаги фарқ жуда катта эди. Ва бу майдонда ҳам ўз сўзини айтди.

Ўйин старти норвеглар учун кутилганидек осон кечмади: улар анча вақтгача ироқликларнинг ҳимоя деворини буза олишмади. Сув ичиб олиш учун қилинган танаффусда эса скандинавлар янгича технологияни намойиш этишди – футболчилар бу вақтда муз солинган махсус салқинлантирувчи рюкзаклар тақиб олишди. Бундан фақат Эрлинг Ҳоланд фойдаланмади.

Шу куни ушбу форвардга катта эътибор қаратилганди – ўз авлодининг асосий юлдузларидан бири саналган ушбу футболчи фаолиятида илк марта жаҳон чемпионатига чиққанди. У қаттиқ ҳаракат қилди: маълумот учун, Ҳоланд Европадаги саралаш турнирида саккиз ўйинда 16 гол билан яққол тўпурар бўлганди. У жаҳон чемпионатида ҳам ўз даражасини намойиш этиб, биринчи бўлимдаёқ дублни расмийлаштирди. Эътиборли томони, у 43 дақиқа ичида Норвегиянинг жаҳон чемпионатлари тарихидаги энг яхши тўпурари (2) Хетил Андре Рекдалнинг натижасини такрорлади. Рекдал ўз голларини иккита жаҳон чемпионатидаги етти ўйинда урганди.

Ҳоланднинг биринчи бўлимдаги голларига ироқликлардан Айман Ҳусайн жавоб қайтарди. Аммо иккинчи бўлимда норвегликлар ўйин масаласини ҳал қилишди – 73-дақиқада захирадан ўйинга қўшилган Лео Эстигор уч дақиқа ўтиб дарвозани ишғол этди, ўйинга қўшиб берилган дақиқаларда эса Ҳусайн ўз дарвозасини ҳам ишғол этиб, антиқаҳрамонга айланди. 4:1 – скандинавлар жаҳон чемпионатида кучли старт олишди.

Мессининг ҳет-триги

Аргентина – Жазоир 3:0
Голлар: Месси, 17 (1:0). Месси, 60 (2:0). Месси, 76 (3:0)
Аргентина: Э. Мартинес, Л. Мартинес, Ромеро (Отаменди, 80), Медина, Монтиэл (Молина, 46), Макаллистер, Фернандес, Алмада (Алварес, 55), де Паул, Месси (Пас, 80), Л. Мартинес (Гонсалес, 55)
Жазоир: Зидан, Манди, Бенсебайни, Айт Нури, Белгали, Бинтолиб (Булбина, 81), Маза (Зерруки, 82), Будавий (Ауар, 64), Шайби, Ҳожи-Мусса (Маҳрез, 64), Гуири (Амура, 64)

Аргентинанинг жаҳон чемпионатидаги ўйинини кўпчилик катта қизиқиш билан кутаётганди – Лотин америкаликлар бу турнирда Қатарда қўлга киритилган титулни ҳимоя қилиши керак. Биринчи рақиб Жазоир бўлди. Африкаликлар – етарлича рақобатбардош жамоа, аммо улар Лионел Месси ва унинг йигитларини тўхтата олишмади.

Умуман, 38 ёшли форварднинг илк дақиқалардан майдонда пайдо бўлиши кичик сюрприз бўлди – у клубда олинган жароҳат туфайли турнирга тайёргарлик йиғинининг бир қисмини ўтказиб юборганди. Аммо барибир биринчи ўйинга тайёр бўлишга улгурди ва биринчи навбатда жаҳон чемпионатларидаги иштирок бўйича рекордни ўрнатди – энди Мессининг ҳисобидаги мундиаллар сони олтитага етди. Унинг натижасини яқин вақтлар ичида такрорлаш имконияти фақат Криштиану Роналдуда бор, у бунинг учун 17 июн куни Португалия сафида Конго ДР миллий жамоасига қарши ўйинда майдонга тушиши керак.

Месси шу куни техник рекордлар билан чекланмади. Тажрибали ҳужумчи ўйинни ўз ҳет-триги билан ҳал қилди: у 17-, 60- ва 76-дақиқаларда афсонавий Зинедин Зиданнинг ўғли Люка Зидан қўриқлаётган дарвозани ишғол этди.

Лео уч голи билан Мирослав Клозенинг ЖЧда урилган жами голлар сони бўйича рекордини такрорлади – энди унда ҳам 16 та гол бор. Аргентиналик ҳужумчи шу турнирнинг ўзида жаҳон чемпионати тарихидаги энг яхши тўпурарга айланиб олиши мумкин. Аммо ҳозирча у фақат Жанубий Америка миқёсида бу мақомга эга бўлиш билан чекланган – у тўртта турнир давомида жами 15 та гол урган бразилиялик Роналдони ортда қолдирди.

Ўйиндан кейин Месси ҳиссиётларини тийиб тура олмади. «Ҳа, мен биринчи голдан кейин йиғладим... Аммо бу умуман футбол билан боғлиқ эмас. Менда қийин кунлар бўлди, мен бутун делегацияга ва жамоадошларимга миннатдорчилик билдирмоқчиман, улар доим ёнимда бўлишди ва мени қўллаб-қувватлашди», – деди Лео.

Франциянинг икки турлича бўлими

Франция – Сенегал 3:1
Голлар: Мбаппе, 66 (1:0). Барколя, 82 (2:0). Мбай, 90+5 (2:1). Мбаппе, 90+6 (3:1)
Франция: Менян, Упамекано, Салиба, Эрнандез, Кунде, Тчуамени, Рабио, Дембеле (Барколя, 80), Дуэ (Шерки, 87), Олисе, Мбаппе
Сенегал: Менди, Кулибали, Ниакате, Диуф, Диатта, Гана Гуйе (Сисс, 88), Гуйе (Денг, 83), Камара (Диарра, 75), Мане, Сарр (Мбай, 75), Жексон (Ндиай, 83)

2018 йилги Россия мундиалида олтин, 2022 йилги Қатар мундиалида кумуш медалларни қўлга киритган Диде Дешам бошчилигидаги «Учранглилар» бу турнирда ҳам фаворитлардан бири. Лекин французлар Сенегалга қарши ўйиннинг биринчи бўлимида жуда суст ҳаракат қилишди: дарвоза соҳасига бирорта зарба берилмади ва xG бўйича атиги 0,02 кўрсаткичи қайд этилди. Африкаликларда эса бир неча хавфли вазиятлар юзага келди, бу вазиятлардан бирида Николас Жексоннинг зарбасидан кейин тўп дарвозабон орқали автоголга айланишига бир бахя қолди. 

Иккинчи 45-дақиқаликда эса ўйин бош ҳаками Алиризо Фағоний жарима майдонида йиқилган Килиан Мбаппега ишонмади ва Сенегал дарвозасига пеналти белгиламади. Бундан аччиғи чиққан 27 ёшли форвард эса якунда дубл расмийлаштириб, Франциянинг ғалабасини таъминлади (3:1). Бу голлари орқали Мбаппе ўз миллий жамоаси тарихидаги энг яхши тўпурар (58 гол) ва жаҳон чемпионати тарихидаги учинчи тўпурарга (14) айланди. У бу борада фақат Месси, Клозе (16 тадан) ва бразилиялик Роналдодан (15) каби футбол афсоналаридан ортда, холос.

Тунисда янги бош мураббий

Африкаликлар жамоаси биринчи турда Швециядан учралган мағлубиятдан (1:5) кейин бош мураббий Сабри Лямушини истеъфога чиқариб, барчани ажаблантирганди. Инсайдерларга кўра, бу истеъфога унинг ўғли (мураббийлар штаби аъзоси) ўйиндан кейин фанатлар билан муштлашувда қатнашгани ҳам сабаб бўлган.

Кейинги куниёқ Лямушининг ўрнига янги бош мураббий топилди: Тунис футбол федерацияси Эрве Ренар тайинлови ҳақида эълон қилди. 57 ёшли мутахассис 2022 йилги жаҳон чемпионатида машҳурликка эришган, ўшанда унинг бошқарувидаги Саудия Арабистони биринчи турда Аргентина устидан сенсацион равишда ғалаба қозонганди (2:1).

Ушбу француз мутахассис Африкада янги эмас. Тунисдан олдин у Замбия (икки марта), Ангола ва Кот-д'Ивуар миллий жамоаларида ҳам ишлаган. Олдинда уни янги жамоа билан Япония (21 июн) ва Нидерландияга (26 июн) қарши ўйинлар кутмоқда.

Кореяликлар бойкоти

Тунис миллий жамоаси вакиллари фанатлар билан уришиб қолган бўлса, Жанубий Корея футболчиларида журналистлар билан муаммо чиқди. Бу можаро мутлақо кутилмаганда юзага келди: жамоанинг Чехияга қарши ўйиндан олдинги машғулоти вақтида ОАВ вакилларининг мулоқоти JTBC телеканали микрофонига ёзилиб қолган – улар Сон Ҳеунг Миннинг армиядаги хизматини мазах қилишган. 

Улардан бири шундай деган: «У ўзини армияда юргандек тутади. Наҳотки у ўзини сардор деб ҳисоблаб, жамоадошларини ортидан югуришга мажбур қила олса?» Бошқаси жавоб қайтаради: «У армияда хизмат ҳам қилмаган». Уларга футболчи ўшанда уч ҳафталик тайёргарликдан ўтиш билан чеклангани (одатда аскарлар 21 ой хизмат ўтайди) ва 2018 йилги Осиё ўйинларидаги ғалаба туфайли тўлиқ хизматдан озод қилингани ёқмаган.

Икки мухбир бундан ташқари жамоа сардори шаънига ҳақоратомуз сўзлар ҳам айтишган.

Бу ёзув ижтимоий тармоқларга тарқалиб кетди, футболчилар эса ўз сардори тарафини олиб чиқишди: улар режалаштирилган интервюларни бекор қилишди ва олдинроқ ёзиб олинган интервюларни чиқармасликни талаб қилишди. Футболчилар матбуот анжуманида яна бир томоша уюштиришди: чет эллик журналистлардан ташқарига чиқиш сўралди, шундан кейин ичкарид қолган кореялик журналистларни қаттиқ койиб беришди.

Немислар базасида илон

Бу мундиалда муаммога учраётган жамоалар сони ортиб бормоқда. Масалан, инглизлар базасига ўғри тушган ва машғулотлар учун жиҳозлар ҳамда тўпларни олиб кетиб, биттагина тўп қолдиришганди. Немислар базасида эса заҳарли илон чиқди.

«Кеча биз илон кўриб қолдик. Бизга айтишларича, у заҳарли эди. У чаққанда шифохонага боришга тўғри келарди. Ўлдиради деб ўйламайман, аммо нима бўлганда ҳам хавфли. Агар бундай илонни босиб оладиган бўлсанг, бу яхшилик билан тугамайди», – дея Германия миллий жамоаси сардори Йозуа Киммиҳнинг сўзларини келтиради Bild.

Нашр маълумотига кўра, гап қалқонтумшуқ илон ҳақида кетмоқда.

Англия ва Ўзбекистон дедлайн арафасида таркибларини янгилади

Бразилия миллий жамоасидагилар Неймар жароҳатдан тузалишини охиригача кутишмоқда (у болдир мушагидаги жароҳат туфайли умумий гуруҳ билан машғулотларни ва Марокашга қарши ўйинни ўтказиб юборди, лекин индивидуал машғулотларни бошлаган), инглизлар ва ўзбекистонликлар эса жароҳатдаги футболчиларини янгиларига алмаштирди. Англия миллий жамоаси ўнг қанот ҳимоячиси Валентино Ливраменто болдир мушагидаги муаммо туфайли ўрнини Тревор Чалобага бўшатиб берди.

Шунингдек, Ўзбекистон миллий жамоаси яримҳимоячиси Жалолиддин Машарипов мундиалда иштирок эта олмайдиган бўлди. У умуртқалараро диск чуррасидан азият чекаётганди ва тиббий штабнинг муолажалари наф бермади, энди унинг ўрнини якуний 26 талик рўйхатда Русланбек Жиянов эгаллади.

17-18 июн кунлари учун тақвим

Жаҳон чемпионатида биринчи тур якунига етмоқда. 17 июн куни кечқурун ва 18 июнга ўтар кечаси K ва L гуруҳларида қуйидаги кучликлар куч синашади:

• 22:00 Португалия — Конго ДР
• 01.00 Англия — Хорватия
• 03.00 Гана — Панама
• 08.00 Ўзбекистон — Колумбия