Ўрикзор бозоридаги озиқ-овқат дўконида ёнғин чиқди

Тошкент шаҳрининг Учтепа туманида жойлашган Ўрикзор бозоридаги озиқ-овқат дўконида ёнғин содир бўлди. Фавқулодда вазиятлар хизмати ёнғин қисқа вақт ичида ўчирилганини, ҳодиса оқибатида жабрланганлар йўқлигини маълум қилди.

Фото: Видеодан кадр

Фавқулодда вазиятлар хизмати маълумотига кўра, 4 июл куни соат 04:26 да Тошкент шаҳри, Учтепа тумани, Тошкент ҳалқа автомобил йўли кўчасида жойлашган Ўрикзор бозоридаги дўконда ёнғин содир бўлаётгани ҳақида хабар келиб тушган.

Шундан сўнг қутқарув бўлинмалари соат 04:35 да воқеа жойига етиб борган. Ёнғин соат 04:48 да қуршаб олинган ва соат 05:01 да тўлиқ бартараф этилган.

Дастлабки маълумотларга кўра, ёнғин натижасида озиқ-овқат дўконининг 150 квадрат метр майдони ёниб зарарланган.

Ҳодиса оқибатида тан жароҳати олганлар қайд этилмаган.

Айни пайтда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.