ЖЧ кундалиги. Ҳоланд Неймарни йиғлатди, Англия жанг қилди

6 июлга ўтар кечаси ва тонгда жаҳон чемпионатининг 1/8 финал босқичида яна икки учрашув бўлиб ўтди. Бразилия турнирнинг кашфиёт жамоасига айланган Норвегияга ютқазди (1:2) ва турнирни тарк этди, Англия эса турнир мезбонларидан бири Мексикага қарши ўта оғир ўйин ўтказди ва қийинчилик билан ғалаба қозонди (3:2). Энди ушбу ғолиб жамоалар кейинги босқичда яримфинал йўлланмаси учун ўзаро ўйин ўтказади.

Неймар кеч қолди

Бразилия – Норвегия 1:2
Голлар: Ҳоланд, 79 (0:1). Ҳоланд, 90 (0:2). Неймар, 90+10 – пеналти (1:2)
Аниқ ижро этилмаган пеналти: Гимараэс, 14’
Бразилия: Алиссон, Габриэл Магаляйнс, Маркиниос, Дуглас Сантос, Данилу Луис, Каземиро, Гимараэс (Эдерсон Силва, 79), Мартинелли (Данилу Сантос, 67), Райан (Неймар, 67), Винисиус Жуниор, Куня (Эндрик, 58)
Норвегия: Нюланд, Айер, Ҳеггем, Волфе (Эстигор, 90+5), Рюэрсон (Эурснес, 63), Берге, Берг, Эдегор, Нуса (Бобб, 46), Сёрлот (Шелдеруп, 46), Ҳоланд
Огоҳлантириш: Неймар, 90

Бразилия Норвегияга қарши бешинчи ўйинида ҳам ғалаба қозона олмади. Карло Анчелоттининг сеҳри иш бермади. Ҳоланд ўз дубли билан Бразилияни уйига қайтариб юборди.

Бразилия плей-оффнинг олдинги босқичида Япония билан ўйинда камбэк амалга оширган ва кўпчилик яна Карло Анчелоттининг магияси ҳақида гапира бошлаганди. Айнан мураббийнинг футболчи алмаштиришлари ва тактик ечимлари иккинчи бўлимда вазиятни ўзгартирганди.

Навбатдаги ўйинда у Японияга қарши ўйиндаги ғалаба голи муаллифи Габриел Мартинеллини илк бор бошланғич таркибга киритди. Аммо у ўзининг доимий амплуаси ҳисобланган чап қанот ҳужумида эмас, ҳужумчи ортида тушди.

Норвегия бош мураббийи Столе Солбаккен эса муваффақиятли таркибни алмаштирмади ва унинг шогирдлари ўйинни ҳужумкор бошлади. Ўйин стартидаёқ Эдегор бошлаган ҳужумни Берг аниқ зарба билан якунлади, аммо бу ҳужум давомида Сёрлот офсайдга тушиб қолгани панд берди.

Кейин эса норвегияликлар ҳужумда тўп йўқотиши бразилияликларнинг тезкор қарши ҳужумига сабаб бўлди, бу ҳужумда Куня пеналти ишлади. Аммо нуқтага яқинлашган Бруно Гимараэс дарвозабонни алдай олмади.

Скандинавлар тўпга эгалик қилишда давом этди, жанубий америкаликлар эса омадини қарши ҳужумлардан излади ва бир неча яхши вазиятларга эга бўлди, аммо Нюланд ишончли ўйнашда давом этди ва биринчи бўлимнинг энг яхши футболчисига айланди.

Биринчи бўлимга қўшиб берилган дақиқаларда норвегияликлар ҳисобни очишга яқин келди: Магаляйнс Ҳоланд билан курашда устун келди ва тўпни тўхтатиб қолди, аммо ортда етиб келган Эдегор уни илиб кетди ва жарима майдонига кириб, ерлатиб зарба берди, Алиссоннинг маҳорати жамоасини голдан сақлаб қолди.

Солбаккен танаффусда ҳужум қанотларини алмаштирди ва Муса-Сёрлот ўрнига Шелдеруп-Бобб жуфтлигини майдонга ташлади. Иккинчи бўлимнинг катта қисмида жамоалар эҳтиёткор ўйин услубини қўллашди. Рақибдан ортиқча хавф сезмаган Анчелотти ҳатто яхши спорт формасида бўлмаган Эндрик ва Неймарни майдонга туширишга жазм қилди. Аммо улардан биринчиси майдонга тушиши билан ўта қулай имкониятни қўлдан бой берди – Винининг заргарона пасидан кейин дарвозабон билан яккама-якка вазиятга чиқиб бораётган ёш футболчи тўпни ўзидан қочириб юборди ва якунда хато зарба берди.

Неймар эса жамоани қутқара олмади, аксинча у майдонга тушганидан кейин жамоа кетма-кет голлар ўтказиб юборди. Аввалига Шелдеруп қанотдан тўпни ҳаволатиб дарвозабон ҳудудига етказди, у ерда Магаляйнс билан тўп учун курашда устун келган Ҳоланд бошда аниқ зарба йўллади – 1:0.

Ушбу ҳужумчи бутун ўйин давомида тўпга деярли тегинмаган бўлса-да, керакли паллада ўзини кўрсатди. Аммо унинг бу голи ғалаба учун етарли бўлмаслиги ҳам мумкин эди – 35 ёшли Нюланд яна бир қаҳрамонлик кўрсатиб, тўсин остидан кириб кетаётган тўпни тўхтатиб қолди.

Ўйин охирида эса Ҳоланд жарима майдони ташқарисидан туриб, Шелдерупнинг яна бир пасини голга айлантирди ва ўйин қаҳрамони мақомини Нюланддан тортиб олди. Бу унинг турнирдаги еттинчи голи бўлди ва у энди Месси ҳамда Мбаппе билан тўпурарлар пойгасидаги иштирокини давом эттирмоқда.

Неймар эса қўшимча дақиқаларда ишланган пеналтини аниқ ижро этиш орқали сўнгги рақсини ижро этди – бу унинг Бразилия миллий жамоаси сафида сўнгги ўйини бўлиб қолади.

У ўйиндан кейин ижтимоий тармоқда шундай ёзди: «Мен қайта ва қайта уриндим. Лекин энди ҳаммаси тугади».  

Мехикода триллер

Мексика – Англия 2:3
Голлар: Беллингҳэм, 36 (0:1). Беллингҳэм, 38 (0:2). Кинионес, 42 (1:2). Кейн, 60 – пеналти (1:3). Р. Хименес, 69 – пеналти (2:3)
Мексика: Ранҳел, Монтес (Алварес, 46), Васкес, Галярдо, Санчес (Фидалго, 79), Лира, Ромо (Гутеррес, 61), Мора (С. Ҳименес, 61), Кинионес (Мартинес, 81), Алварадо, Р. Ҳименес
Англия: Пикфорд, Конса, Гейи, О`Райли (Спенс, 74), Куанса, Райс, Андерсон (Бёрн, 75), Беллингҳэм, Гордон, Сака (Стоунс, 57), Кейн (Роджерс, 90)
Огоҳлантиришлар: Санчес, 71. Васкес, 90 – Райс, 1. Гейи, 68. О`Райли, 72
Четлатиш: Куанса, 54

Турнир фаворитларидан бири ҳисобланган Англия – чоракфиналда. Томас Тухел жамоаси бешта гол урилган ва ёрқин кечган ўйинда турнир мезбонларининг юришини тўхтатди. Энди инглизлар плей-оффнинг кейинги босқичини 12 июл куни Норвегияга қарши ўтказади.

Англия ўтган босқичда Конго ДР билан ўйинда қийинчиликка учраганди ва бош мураббий бошланғич таркибда ўзгаришлар қилишга қарор қилиб, ҳужум қанотларини алмаштирди: Рэшфорд ва Мадуэке ўрнида илк дақиқалардан Гордон ва Сака ҳаракат қилди. Шунингдек, ўнг қанот ҳимоясида Спенс ўрнини жароҳатидан тузалган Куанса эгаллади. Ҳавиер Агирре эса ҳеч нарсани ўзгартирмади, унинг жамоасида барчаси яхши кетаётганди: мексикаликлар турнир бошидан буён гол ўтказмаган икки жамоадан (иккинчиси Испания) бири бўлиб турганди.

Ўйинни инглизлар кучли прессинг билан бошлашди, лекин Райс ортиқча жонбозлик кўрсатиб, хавфли ўйин учун қизил карточка олишига бир бахя қолди – агар унинг оёғи бир неча сантиметрга оғиб кетганида инглизлар ўйин стартидаёқ ўн киши бўлиб қолиши мумкин эди.

Шундан кейин Мексика ташаббусни қўлга олди ва вазиятларга эга бўла бошлади. 15-дақиқада Раул Ҳименес ҳисобни очишга яқин эди — аммо унинг бошда дарвозанинг пастки бурчагига йўллаган мураккаб зарбасини Пикфорд қайтариб қолди.

Кулинг брекдан кейин эса Англия ҳам ўзига келди ва ўйин бошидан буён илк бор дарвоза соҳаси томон тўғри борган зарбасини йўллади. Аммо Гордоннинг зарбасидан кейин Ранҳел тўпни эгаллаб олди.

Ўйиннинг сўнгги 10 дақиқалиги қизиб кетди. Мексика ҳужум қилишда давом этди, ҳисобни эса инглизлар очишди. Аввалига 36-дақиқада Райс бутун майдонни тўп билан босиб ўтди ва қанотда ўзини таклиф қилган Сакага етказди, у эса тўпни ҳаволатиб жарима майдони марказига оширди, у ерда мексикалик ҳимоячилар Беллингҳэмни қўриқлай олишмади.

Мексикаликлар бу зарбадан ўзига келишга улгурмасдан иккинчи голни ўтказиб юборишди: майдон марказида турнирнинг энг ёш футболчиси, 17 ёшли Гилберто Мора Гордон ва Андерсоннинг босими остида тўпни олдирди, тезкор қарши ҳужум Кейн Беллингҳэмнинг иккинчи голига ассистентлик қилиши билан якунланди.

Шунга қарамай, Мексика сочилиб кетмади ва тезда жавоб голини урди. Стандарт вазият ижро этилганида Конса тўпни узоқлаштиришда хатога йўл қўйди ва дарвоза қаршисида ёлғиз қолдирилган Кинионес қайтариб бўлмас зарба йўллади ва турнирдаги тўртинчи голини урди – 1:2.

Танаффусга қадар Раул Ҳименесда яна иккита яхши вазият бўлди: аввалига олис бурчакни аниқ нишонга ололмади, кейин эса Пикфорд унинг зарбасидан кейин тўсин остига бораётган тўпга етиб борди.

Мексикаликлар ҳимоячиси Сесар Монтес эса ҳисобни тенглаштириш учун ўта қулай вазиятни қўлдан чиқарди: дарвозага жуда яқин турган футболчи тўпга бир тегинишда зарба бера олмади ва ортдан етиб келган Беллингҳэм хавфни бартараф этди.

Мексикаликлар устози ушбу футболчисини танаффусда алмаштириб юборди.

Иккинчи бўлим стартида инглизлар учинчи голни ҳам уришга яқин келди, аммо Нико О’Райлининг зарбасидан кейин тўп устунга борди. Бироз ўтиб эса ўйинни буткул ўзгартириб юборган воқеа содир бўлди: 53-дақиқада Жаррел Куанса жамоадошларини қийин аҳволга солиб қўйди. У Галярдодан тўпни олиб қўйишга уриниб, бутсасининг остки қисми билан рақибнинг тўпиғига зарба берди, бош ҳакам VAR аралашувидан кейин инглизлар ҳимоячисини майдондан четлатди.

«Ацтека» ўйингоҳига йиғилганлар байрам қилишга киришди, аммо уларнинг қувончи узоққа чўзилмади – мексикаликлар дарвозабони Ранҳел жарима майдонига кириб келган Гордонни йиқитди ва пеналтига сабабчи бўлди. Кейн зарбани аниқ ижро этиб, турнирдаги голлари сонини 6 тага етказиб олди.

Мексика сон жиҳатдан устунлигидан фойдаланиб, тўлиқ ҳужумга ўтди ва голлар шоусини давом эттирди. Жавоб голи ҳам пеналтидан урилди – ҳимояга ёрдамга қайтган Кейн тўпни узоқлаштиришга уриниб, ортдан келган рақиб футболчисига зарба бериб юборди.

Нуқтага яқинлашган Ҳименес совуққонлик билан зарба йўллади – 2:3.

Шу паллада навбатдаги кулинг брек инглизлар жонига ора кирди. Томас Тухел юзага келган танаффусдан фойдаланиб, шогирдларига керакли кўрсатмаларни берди ва жамоа 5-3-1 схемасида ўйнашга киришди. Мураббий захирадан Жон Стоунз, Спенса ҳамда бу мавсумда ҳали ўйнамаган Ден Бёрн каби ҳимоячиларни майдонга ташлади, унинг жамоаси қолган ярим соат мобайнида (ўйинга 11 дақиқа қўшиб берилди) бор эътиборини рақибни жарима майдонига киритмасликка қаратди ва буни аъло даражада уддалади. Мексикаликларнинг ҳаводан узатмалари наф бермади. Ўйинга қўшиб берилган дақиқалар тугаётганида ҳисоб тенглашиши мумкин эди, аммо дарвозабон ҳудудида икки рақиб қуршовида турган Стоунз тўпни майдондан чиқариб юборишга улгурди.

Инглизлар ҳисобдаги устунликни сақлаб қолиш учун жанг қилди ва якунда омон қолди.

Энди навбатда 12 июл куни Эрлинг Ҳоланд бошчилигидаги норвегларга қарши кечадиган яна бир жанг кутмоқда.