Тошкентда онлайн қимор учун машина ўғирлаган шахс қўлга олинди

Тошкент шаҳрида бировнинг машинасини ўғирлаган шахс ушланди. Бу ҳақда пойтахт ЙҲХБ матбуот хизмати хабар берди.

Маълум қилинишича, эркак Юнусобод туманидаги автомобилларни ювиш шохобчасидан Spark машинасини эгасининг рухсатисиз олиб қочиб кетган. Тошкент шаҳар ИИББ Жиноят қидирув бошқармаси ҳамда ЙҲХБ қидирув бўлими ходимлари олиб борган тезкор суриштирув ишлари натижасида машина Бектемир туманида топилиб, гумондор қўлга олинган.

“Мойка”дан Spark’ни олиб кетиб қолдим. Бу ёққа келганимга ҳозир бир соатча бўлди. Мақсад – “запчаст” қилиб сотиш эди. Онлайн қимор ўйнайман. Ўша Ўшанга пул тикиб, ютаман деган мақсадда шу ишни қилдим”, деган эркак.

Ҳозирда ҳолат юзасидан қонунчиликда белгиланган тартибда терговга қадар текширув ва процессуал ҳаракатлар олиб борилмоқда.

Тошкент шаҳар ЙҲХБ фуқаролардан машиналарини қаровсиз қолдирмаслик, калитларини бегона шахсларга ишониб топширмаслик ҳамда хавфсизлик чораларига қатъий риоя қилишни сўраган. 

Маълумот учун, Жиноят кодексининг 267-моддасига кўра, транспорт воситасини талон-торож қилиш мақсадида ўғрилик ёки талончилик йўли билан олиб қочиш 10 йилдан 15 йилгача озодликдан маҳрум қилиш билан жазоланади.