“Эгнидаги формасига ишониб қолибман” – Андижонда ЙХҲБ инспектори одамларни чув туширди

Андижон вилояти ИИБ ЙҲХБ инспектори Бекзод Ғойибназаров автомобилини сотувга қўйган бир неча кишини чув туширди. У одамларнинг ишончига киришда ўз хизмат мавқейидан фойдаланган, расмий формада видеоларга тушиб, ваъдалар берган. Сержант ҳали ўз номига ўтмаган машиналарни сотиб юбориб, пулларни онлайн қиморга тиккани айтиляпти.

Бекзод Ғойибназаров 2025 йилнинг 13 октябр куни Gentra машинасини сотаётган Абдуллоҳ Неъматов билан учрашади. Автомобил 8 500 долларга савдо қилинади ва ходим 20 декабр куни бу пулни беришини маълум қилади. Лекин орадан 7 ой ўтибдики, на пулдан ва на машинадан дарак йўқ.

Формали ходим алдамаса керак, дея ўзини овутишга ҳаракат қилган Абдуллоҳ ниҳоят чув тушганини англаб етади ва бу ҳақда инспекция ва Андижон шаҳар прокуратурасида хабар қилади.

ЙҲХБ инспектори бу вазиятдан ҳам чиқиб кетиш йўлини тутиб, машина эгасидан аризасини қайтариб олишни сўрайди, эвазига ҳар ой ойлик маошидан 1 000 доллардан бериб бориб қарзини тўлашини ваъда қилади. Лекин бу гал ҳам Абдуллоҳ Неъматовнинг қўйни пуч ёнғоққа тўлган эди.

Сержант Бекзод Ғойибназаров бошқаларнинг ҳам ишончига кириб, пулини қўлга киритиб, бермай юргани маълум бўлди.

“Формада сёмкага тушиб бераман, сотаверинг ука...”

Ходимнинг ҳийласига учган Абдуллоҳ Неъматов:

— Gentra машинам бор эди, Андижон вилоят ЙҲХБ ходими Бекзод Ғойибназаров 2025 йилнинг октябр ойида машинани менга сотасиз, деб қўярда қўймай илтимос қилди. Йўқ, сотмайман, десам ҳам, “ука, формада сёмкага тушиб бераман”, деб туриб олди. 8 500 АҚШ долларига савдони пишитдик. Келишилган пулни 20 декабр куни бериши керак эди.

Машинага ўтириб келишув ҳақида видео ҳам қилдик. Формасига ишониб машинани қандай қилиб сотиб юборганимни ўзим ҳам билмай қолдим. Gentra'ни кимгадир сотган экан. Уни сотиб олган одамнинг номига хужжатларни ҳам расмийлаштириб бердим.

Орадан 7 ой ўтибдики, пулдан ҳам, машинадан ҳам дарак йўқ. Бу ҳақда инспекцияга мурожаат қилдим, инспекция хизмат текширув олиб бориб, хужжатларни прокуратурага чиқарди. Иш прокуратурага чиққандан кейин Бекзод Ғойибназаров: “Аризангизни қайтариб олинг, ҳар ойнинг 25-санасида ойлигимдан 1 000 доллардан бераман, 8 ойда қутуламан қарзимдан”, деб илтимос қилди. Кўнглига қараб бу сафар ҳам хўп, дедим. Лекин у энди телефонимни ҳам кўтармай қўйди.

Одамларнинг айтишига қараганда, ходим онлайн қиморга ютқизиб қўйиб кўпчиликдан қарз бўлиб кетган экан. Дўкончидан 5-6 та iPhone олиб, уни ҳам бермай юргани ҳақида эшитдим. Яна бир кишининг Сaptiva машинасини олиб, уни ҳам пулини бермай сотиб юборган экан.

Формали одамни алдаб кетиши ақлига сиғмайди-да, бундай бўлишини хаёлимгаям келтирмаган эдим. Аризамни қайтариб олганимдан кейин яна йўқ. Ҳеч қаердан топиб бўлмаяпти. Алоқага чиқмаяпти. Телефон қиляпман, ўчиқ телефони. Telegram'дан ёзсам ўқимаяпти. Ҳеч қаердан топиб бўлмаяпти. Ишхонасидаги ходимлар билан ҳам гаплашдим. Қарзи жуда кўп, кечиб юборавер пулингни дейишяпти.

Тегишли ташкилотлардан пулимизни олиб беришларини илтимос қиламиз...

“Уйимизни сотувга қўйганмиз, сотилса бераман...”

Инспекторга алданиб қолган Шерзод Холдоров:

— Машинафурушман. 21 январ куни инспектор Бекзод Ғойибназаров сотиладиган Captiva бор, деб чақирди. Учрашдик. Машина бир аёлнинг номида экан. 7 200 долларга келишдик. Мен бу пулни ўша аёлнинг укасига бердим. Инспектор пулни машина эгасидан олиб, онлайн қиморга тикиб юборган экан. Ўзи ҳам буни тан оляпти: “1ХBET ўйнаб ёмон йўлга кириб қолдим, акалар, озгина муҳлат беринглар”, деди.

Captiva эгаси бўлган аёл энди машинани номимга ўтказиб бермаяпти. Машина уйимда турибди. Бошим қотган. Пулларини тўлаб берганмиз, бизда сёмкаларигача бор.

Телефонларини ўчириб олган, уйига борсак, “пул йўқ”, деяпти. Онаси тинмай йиғлаб: “Уйимизни сотувга қўйганмиз, сотилса бераман”, деяпти. Лекин уй сотилади деб ёзилган эълон ҳам йўқ-да...

“Инспектор ишдан бўшатилган...”

Андижон вилояти ИИБ ЙХҲБ Ахборот хизмати бўлими бошлиғи Абдумажид Райимжонов:

— Андижон вилояти Ички ишлар бошқармаси Жамоат хавфсизлиги хизмати Йўл ҳаракати хавфсизлиги бошқармасининг 5-сафарбар гуруҳ инспектори, сержант Бекзод Ғойибназаров 2013 йилдан бери тизимда ишлаб келган. 2025 йил охирларида ходим устидан бир неча аризалар келиб тушган. Яъни, пул олди-берди масаласида.

Ходим устидан мурожаатлар кўпайиб кетганлиги сабабли вилоят Йўл ҳаракати хавфсизлиги бошқармаси раҳбарияти томонидан ҳолат танқидий муҳокама қилиниб, ходимга нисбатан хизмат текшируви тайинланган. Вилоят Ички ишлар бошқармасида аттестация тартибига муҳокамага ҳавола этилган ва аттестация тартибида кўриб чиқилганидан сўнг, бу ходимни вилоят Ички ишлар бошқармаси бошлиғининг тегишли буйруғига асосан 2026 йил 30 мартда Ички ишлар органлари сафидан, яъни тизимдан бўшатилган.