«Аргентинани чемпионлик билан табриклайман». Мисрликлар ҳакамликдан норози

Миср миллий жамоаси 1/8 финалда Аргентинага ютқазиб, жаҳон чемпионатини тарк этди. Мағлубият жуда аламли бўлди – африкаликлар жамоаси иккинчи бўлим давомида 2:0 ҳисобида олдинда бориб, ўйин охирида 13 дақиқа ичида учта гол ўтказиб юборди. Ўйиндан кейин жамоа вакиллари ҳакамликни кескин танқид қилишди.

«Ҳакам миллат орзусини барбод қилди»

Ўйиндан кейин Миср миллий жамоаси бош мураббийи Ҳуссам Ҳассан ҳамда жамоа ҳужумчиси Мустафо Зико ўз интервюларида ФИФАни сохтакорликда айблаб, жаҳон чемпионатида ҳамма нарса Лионел Мессининг фойдасини кўзлаб қилинганини айтишди.

Мураббий Аргентинани муддатидан олдин «чемпионлик» билан табриклаган ва бу жамоа «ўйнамасдан ҳам чемпион бўлиши»ни айтган:

«Биз бугун яхшироқ ўйнадик, аммо футболда адолат йўқ. ФИФА фейр-плей тарафдори бўлса ҳам, бўлиб ўтган воқеалар адолатсизлик эди. Ҳакам арзирли сабабсиз голни инобатга олмади. Кейин бизга пеналти берилмади. Ҳисоб 3:1 бўлиши мумкин эди, аммо амалда 2:2 бўлди.

Пеналти билан боғлиқ эпизодда Ҳамди Фатҳини жарима майдонида очиқчасига футболкасидан тортиб йиқитишганди.

Балки гап маркетингдадир. Балки кимдир жаҳон чемпионатида муайян жамоа ёки муайян юлдуз яна ғолиб бўлишини хоҳлар. Бу яна Аргентина ва яна Месси бўлишини.

Мен футболчиларга миннатдорчилик билдираман, улар сўралган ишни қилишди, биз ажойиб даража намойиш этдик, Миср, араб дунёси ва Африка футболини биз билан фахрланишга мажбур қилдик. Аммо вазифани мураккаблаштирадиган ташқи омиллар бор. Албатта, иложи борича узоқроққа бориб, мухлисларга янада кўпроқ қувонч бағишлашни истардик, мен ютқазишни ёмон кўраман. Мағлубият бундай адолатсизлик билан келганда эса жуда ҳам оғир. Шунинг учун мени кечиринг ва мендан хафа бўлманг.

Мен фақат бир нарсани – адолатни сўрайман. ФИФА адолатли ўйин тамойили ҳақида гапиради, аммо менимча, бизни жиддий хафа қилишди. Белгия билан биринчи ўйинда ҳам бизга аниқ пеналти белгиланмаган эди. Ҳозир ҳам шундай бўлди. Ҳакамларнинг хатолари ҳал қилди».

Иккинчи бўлим ўрталарида биринчи голи бекор қилинган ҳужумчи Мустафо Зико ҳам франциялик ҳакам Франсуа Летексенинг ишини жуда паст баҳолаган.

«Ҳакам бизни мағлуб қилиш учун майдонга тушганди. Биз Миср халқини хурсанд қилишга умид қилгандик, аммо охир-оқибат Аргентинани жаҳон чемпионатидаги ғалабаси билан табриклаймиз. Бу сохта турнир ва энди улар қолган ўйинларни ўйнашлари ҳам шарт эмас. Ҳакам бутун бир миллатнинг орзусини барбод қилди ва у бизни нишонга олди, чунки биз Аргентинани мағлуб этмаслигимиз керак эди. Энди худо олдида жавоб берсин.

Яна бир гап айтмоқчиман: агар улар Аргентинанинг ғалаба қозонишини шунчалик хоҳлашса, унда нега қолганларни ҳам келиб мусобақада қатнашишга чақиришди?» – деди Зико.

Салоҳ эса нисбатан мулоҳазакорлик қилган.

«Аввало, бу Худонинг иродаси эди. Ўйин тақдири ва унинг натижаси шундай бўлиши ёзилганди. Биринчи бўлимни ажойиб ўтказдик ва иккинчи бўлимнинг катта қисмида ҳам яхши кўриндик. Аммо бир неча кичик хатоларга йўл қўйдик. Ҳакамликка келсак, изоҳ бермасликни маъқул кўраман. Нима бўлганини ҳамма кўрди. Бошқа айтадиган гапим йўқ.

Бизнинг гол бекор қилинди, шунингдек, фойдамизга пеналти ҳам қўйилмади. Шундан сўнг рақиб дарҳол қарши ҳужумга ўтди ва гол урди. Мураббий бизни турнирдаги иштирокимиз учун табриклади. Биз турнирда эришганларимиз асосида келажак қурамиз ва Худо хоҳласа, олдинда бизни янада муваффақиятли келажак кутмоқда», – дея унинг сўзларини келтиради Globo.

Миср футбол ассоциацияси Аргентинага қарши учрашувдаги ҳакамлик бўйича ФИФАга расмий шикоят юборди. Ассоциация президенти Ҳани Абу Рида учрашувдаги баҳсли вазиятлар юзасидан текширув ўтказишни, шунингдек ўйинда ишлаган Франсуа Летексе бошчилик ҳакамлар бригадасини турнирдан четлатишни талаб қилган.

Ўйиндаги қайси вазиятлар мисрликларни норози қилди?

Қуйида Миср вакиллари назарда тутган учта эпизод ҳақида.

58’ – Зико қарши ҳужумда гол урди, аммо бу гол VAR аралашуви билан бекор қилинди: видеотакрорда ҳужум бошланишида Марвон Аттиа тўпни Лисандро Мартинесга нисбатан қўполлик ишлатиб, олиб қўйгани маълум бўлди.

Қоида бўйича ҳакамнинг қарори тўғри, аммо бу турнирда бир неча марта бу каби ҳолатлар бошқача талқин этилганди.

91:13’ – мисрликлар бир ҳужумдаги икки ҳолат учун пеналти сўрашди: аввалига Ҳамди Фатҳи рақиб жарима майдонида Алексис Мак Аллистер билан тўп учун курашда йиқилди.

Бир қарашда бу ҳолат учун пеналтига асос кўринмайди, контакт кескин эмасди. Мак Аллистер рақибнинг қўлидан ушлагани рост, аммо мисрлик футболчи ҳам актёрлик маҳоратини ишга солгандек тасаввур уйғонди.

91:38’ – Салоҳ жарима майдони ичида йиқилди, бу вазиятда Ҳулиан Алварес ҳимояга ёрдамга қайтган ва ундан тўпни олиб қўйиб, қарши ҳужум бошлаган – Аргентина ғалаба голини урганди.

Видеотакрор эса Алварес тўпга ўйнагани, кейин эса Салоҳ мувозанатни йўқотиб, инерция бўйича унинг оёғига урилганини кўрсатди.

Сўнгги дақиқалардаги тўқнашувлар

Аргентинанинг учинчи голидан кейин деярли барча мисрликлар Франсуа Летексега ташланишди: улар голни бекор қилиб, Аргентина дарвозасига пеналти қўйишни талаб қила бошлашди.

Аммо VAR хонасидаги ҳакамлар уни мониторинг қаршисига чақиришмаганди. 

Летексе эса Миср мураббийлар штаби вакилларидан бирига қизил карточка кўрсатганидан кейингина вазият тинчланди ва ўйин давом эттирилди.

Бу вақтда таймер 95:21 рақамларини кўрсатаётганди. Голдан кейин юзага келган уч дақиқалик тўхталишни ҳакам компенсация қилиши керак эди (у қўшимча дақиқаларга вақт қўшиб берди ҳам).

Кейин эса жанубий америкаликлар, биринчи навбатда дарвозабон Эмилиано Мартинес очиқчасига вақт чўзишга киришди.

Миср тўпни марказдан ўйинга киритди, жарима майдонига узатма берилди, у ерда тўпга эга чиққан дарвозабон ерга ётиб олди ва тўпни 8 сония (қоида бўйича 6 сониягача мумкин) қўлида ушлаб турди.

Бироз ўтиб Мартинес яна вақт чўзди: бу сафар тўпни 10 сониядан кўпроқ ўзида ушлаб қолди. 6:12-дақиқада тўпни олганди, ўйинга 6:25-дақиқада киритди. Бу қоидабузарлик эди, аммо ҳакам буни эътиборсиз қолдирди.

7:30’ – Марван Аттиа майдон марказида Энцо Фернандесга нисбатан фол ишлатди.

7:55’ – аргентиналиклар ҳали ҳам тўпни ўйинга киритмаганди, мураббийлар штаби бунга эътибор қаратишни сўрай бошлади. 

Ҳассан эса шу паллада қўллари билан X шаклини намойиш этгани учун сариқ карточка олди (ФИФАнинг янги протоколига кўра, бундай ҳаракат ҳакамга ирқчилик ҳақида сигнал беришни англатади. Ҳассан айнан ким томонидан кимга ирқчиликни назарда тутгани ва ҳакам нега унинг ўзини жазолагани номаълум).

Ҳассан қўллари жест қилишда давом этди ва бош ҳакам уни охирги марта огоҳлантириш учун чопиб келди.

Жамоа бошлиғи Иброҳим Ҳассан акасини тинчлантирди, шу билан бирга, ҳакамга қарата соатни англатувчи ҳаракат қилди.

Аммо вақт барибир етмади – Аргентина ғалабали ҳисобни сақлаб қолди. Франсуа Летексе финал ҳуштагини чалганида 12-қўшимча дақиқа ўтиб бораётганди, ҳолбуки аввалига етти дақиқа қўшганди. Мисрликларнинг вақт қўшиб бериш бўйича сўровлари бажарилди, аммо уларнинг ўзи бундан фойдалана олмади.

Шундан кейин мисрликлар турнирдаги сохтакорликлар ҳақида шов-шувли чиқишлар қила бошлашди.