Саратов НҚЗдаги асосий қурилма ишдан чиқди — Reuters

Россиянинг Саратов вилоятида жойлашган йирик нефтни қайта ишлаш заводи Украина дронлари ҳужумидан кейин номаълум муддатга ишини тўхтатди. Reuters агентлиги манбаларига кўра, зарба корхонанинг асосий технологик қурилмасига теккан бўлиб, бу ҳолат Россияда ёнилғи тақчиллиги кучайиб бораётган бир пайтга тўғри келди.

Фото: REUTERS

Reuters агентлигининг икки нафар вазиятдан хабардор манбасига таяниб хабар беришича, Украина учувчисиз учиш аппаратлари Саратов нефтни қайта ишлаш заводидаги хом нефтни дастлабки қайта ишлашга мўлжалланган асосий CDU-6 қурилмасини ишдан чиқарган.

Манбаларнинг айтишича, мазкур қурилма кунига 20 минг тоннагача нефтни қайта ишлаш қувватига эга бўлган ва заводда бундай турдаги ягона технологик линия ҳисобланган. Шу сабабли унинг ишдан чиқиши бутун корхона фаолиятининг тўхташига олиб келган.

Саратов вилояти губернатори Роман Бусаргин 8 июл куни учувчисиз аппаратлар ҳужуми оқибатида «фуқаролик инфратузилмаси объектлари»га зарар етганини тасдиқлаган, аммо қайси объектлар шикастланганига аниқлик киритмаган.

Украина Қуролли кучлари Бош штаби эса айнан «Роснефть» компаниясига қарашли Саратов нефтни қайта ишлаш заводи нишонга олинганини маълум қилди. Ушбу корхона Россиянинг Украинага қарши кенг кўламли уруши бошланганидан бери бир неча бор дронлар ҳужумига учраган.

Reutersʼнинг сўровига «Роснефть» компанияси изоҳ бермаган.

Россияда бир нечта йирик НҚЗ ишини чеклаган

«Новая газета Европа» ҳисоб-китобларига кўра, 2026 йилнинг дастлабки олти ойида Украина дронлари ҳужумлари ортидан Россияда камида 13 та нефтни қайта ишлаш заводи тўлиқ ёки қисман ишини тўхтатган.

Нашр маълумотларига кўра, бунинг натижасида мамлакат нефтни қайта ишлаш қувватларининг тахминан 25 фоизи, бензин ва дизел ёнилғиси ишлаб чиқариш қувватларининг эса қарийб 30 фоизи вақтинча ишдан чиққан.

Айрим заводларда таъмирлаш ишлари бир неча ой давом этиши мумкин. Масалан, июн ойи ўрталарида ҳужумга учраган Москва вилоятидаги Капотня нефтни қайта ишлаш заводи камида декабр ойигача тўлиқ қувватда ишлай олмаслиги айтилган.

Ёнилғи тақчиллиги миллионлаб аҳолига таъсир қилмоқда

Financial Times нашри ҳисоб-китобларига кўра, июл ойи бошига келиб Россияда юзага келган бензин тақчиллиги тахминан 50 миллион нафар аҳолига таъсир кўрсатган. Бу мамлакат аҳолисининг қарийб 35 фоизига тенг.

8 июл ҳолатига кўра, Россиянинг кўплаб ҳудудларида маҳаллий ҳокимиятлар ва ёнилғи етказиб берувчилар бензин сотувига турли чекловлар жорий қилган. Байкалорти ўлкаси, Пенза ва Иркутск вилоятларида эса «юқори тайёргарлик» режими эълон қилинган.

Шунингдек, Россия ҳукумати дизел ёнилғиси ишлаб чиқарувчиларига камида 31 июлгача маҳсулотни экспорт қилишни тақиқлаган. Бундай чекловлар 2026 йил январидан амал қилиб келаётган бўлса-да, аввал улар тўғридан тўғри ишлаб чиқарувчиларга татбиқ этилмаган эди.

Россия бош вазири ўринбосари Александр Новакнинг айтишича, мавжуд вазиятда нефтни қайта ишлаш компаниялари ишлаб турган заводларни максимал қувватда ишлатмоқда, аввалдан тўпланган ёнилғи захираларини ички бозорга чиқармоқда, режали таъмирлаш муддатларини қисқартирмоқда ҳамда айрим таъмирлаш ишларини кейинги муддатларга кўчирган. Шунингдек, ўрта ва кичик нефтни қайта ишлаш заводлари имкониятларидан ҳам фойдаланилмоқда.