Америкалик нуфузли сенатор Линдси Грэм вафот этди

Бутун фаолияти давомида ташқи сиёсатга катта эътибор қаратган Линдси Грэм Россия билан урушда Украинанинг ашаддий тарафдори эди. Шунингдек, у Эронга қарши уруш бошлаш қарорини қабул қилишда Трампга катта таъсир кўрсатган сиёсатчилардан бири бўлгани айтилади.

Фото: Reuters

Республикачи сенатор Линдси Грэм «қисқа ва кутилмаган касаллик»дан кейин 71 ёшда вафот этди. Бу ҳақда The Washington Post сенатор идорасига таяниб хабар тарқатди, ҳозирча бошқа тафсилотлар келтирилмади.

NBC News телеканали хабар беришича, шанба куни кечқурун сенаторнинг Капитолий тепалигидаги уйига юрак хуружи боғлиқ чақирув бўйича тез ёрдам етиб келган. Хабарда беморнинг шахси ошкор этилмаган.

Грэм илк бор 2002 йилда Сенатга сайланган, 20 йилдан ортиқ вақт давомида ташқи сиёсат ва мудофаа сиёсатидаги ёрқин шахслардан бирига айланган. Сенатнинг ҳозирги таркибида у бюджет қўмитаси раиси бўлиб ишлаган ва президент Доналд Трампнинг муҳим иттифоқчиси ҳисобланган.

Грэм РФ ҳукуматининг ашаддий танқидчиларидан бири эди ва бир неча марта Россияга қарши санкциялар ҳақидаги қонун лойиҳаларини муҳокамага киритган. 2024 йил февралида Росфинмониторинг уни «Экстремистлар ва террорчилар рўйхати»га киритганди.

У, шунингдек, АҚШнинг қатъий ташқи сиёсати ва Америка қуролли кучларини кучайтириш тарафдори эди. АҚШ президенти Доналд Трампнинг Эрон билан уруш бошлаш қарорида у ҳам катта рол ўйнагани айтилади.

Трамп Truth ижтимоий тармоғида шундай ёзди: «Сенатор Линдси Грэм мен таниган энг буюк инсон ва буюк санаторлардан бири эди. У доимо чинакам америкалик ватанпарвар бўлган. Линдининг йўқлиги жуда сезилади».

Украинадаги нашрлар ёзишича, 10 июл куни Грэм Киевга келган ва Украина президенти Володимир Зеленский билан учрашганди.

«Путин Украинада тўхтамайди, – деганди Грэм 2023 йилда BBC учун берган интервюсида. – Украинада заифлик кўрсатиш эса Тайванда ютқазиш демакдир».