Шавкат Мирзиёев Бекободга электропоездда борди

Президент Шавкат Мирзиёев Тошкентдан Бекобод шаҳрига янги электропоездда ташриф буюрди. Бекобод темирйўл вокзалида давлат раҳбарига мазкур йўналишда амалга оширилган ишлар ва янги транспорт хизмати ҳақида ахборот берилди.

Мазкур лойиҳа президентнинг 2025 йил 27 декабрда қабул қилинган «2030 йилга қадар темир йўл транспортида маҳаллий йўналишларда йўловчи ташиш кўрсаткичларини ошириш чора-тадбирлари тўғрисида»ги қарори ижроси доирасида амалга оширилди.

Узунлиги 192 километр бўлган «Тошкент – Бекобод» темирйўл йўналишида олти вагондан иборат замонавий электропоезд ҳаракатланади. Поезд 586 нафар йўловчига мўлжалланган бўлиб, соатига 120 километргача тезликда ҳаракатланиш имкониятига эга.

Янги қатнов, айниқса, ҳар куни иш ва ўқиш мақсадида Тошкент ҳамда Бекобод ўртасида қатнайдиган фуқаролар учун транспорт хизматларини анча енгиллаштириши кутилмоқда.

Электропоезд замонавий талаблар асосида жиҳозланган. Вагонларда кондиционер ва иситиш тизимлари, юмшоқ ўриндиқлар, USB қувватлаш нуқталари, Wi-Fi тармоғи, электрон ахборот таблолари ва видеокузатув тизимлари ўрнатилган. Шунингдек, ногиронлиги бўлган шахслар учун махсус кўтаргичлар ҳамда велосипедлар учун алоҳида жойлар ташкил этилган.

Таъкидланишича, янги электропоезднинг йўлга қўйилиши автомобил йўлларидаги транспорт юкламасини камайтириш, экологик тоза транспорт турлари улушини ошириш ҳамда аҳолига кўрсатилаётган транспорт хизматлари сифатини юксалтиришга хизмат қилади.

Ташриф чоғида президент темир йўл инфратузилмасини янада ривожлантириш, йўловчилар учун шароитларни яхшилаш, темирйўл тармоқларини электрлаштириш ва вокзаллар ҳамда уларга туташ ҳудудларни ободонлаштириш бўйича мутасаддиларга тегишли топшириқлар берди. Шунингдек, вокзал инфратузилмасини такомиллаштириш, хизмат кўрсатиш сифати ва йўловчилар ҳаракатини самарали ташкил этиш масалаларига алоҳида эътибор қаратилди.