Серра-Леонедан юборилган кокаин Тошкентда ушланди

Тошкент шаҳрида Серра-Леонедан курерлик жўнатмаси орқали олиб кирилган 728 грамм кокаин мусодара қилинди. Гиёҳвандлик воситаси автоэҳтиёт қисмлари ичига яширилган бўлиб, уни қабул қилиб олган шахс қўлга олинди.

Фото: Видеодан кадр / ДХХ

Давлат хавфсизлик хизмати ҳамда Божхона органлари ходимлари томонидан «Хавфсиз ва соғлом юрт» кенг қамровли тезкор-профилактик тадбирлари доирасида гиёҳвандлик воситаларининг ноқонуний айланмасига қарши навбатдаги тезкор операция ўтказилди.

Маълум қилинишича, Серра-Леоне давлатидан юборилган курерлик жўнатмасини Тошкент шаҳрининг Яккасарой туманидаги хусусий курерлик хизмати орқали қабул қилиб олмоқчи бўлган Яшнобод туманида яшовчи, 1983 йилда туғилган, муқаддам судланган шахс ушланган.

Текширув давомида автоэҳтиёт қисмлари ичига яширилган 728 грамм кокаин борлиги аниқланиб, гиёҳвандлик воситаси процессуал тартибда мусодара қилинди.

Шунингдек, гумонланувчининг яшаш хонадони кўздан кечирилганда, зип-пакетларга жойланган кукунсимон моддалар ҳамда таркибида наркотик моддалар мавжуд бўлган ширинликлар ашёвий далил сифатида олинди.

Ҳозирда мазкур шахсга нисбатан Жиноят кодексининг 246-моддаси 2-қисми билан жиноят иши қўзғатилган бўлиб, тергов ҳаракатлари давом этмоқда.