Лавров Украинани «Путиннинг қароргоҳига ҳужум қилиш»да айблади. Бу ҳақда нималар маълум?

Россиядагилар нима дейишди?

РФ ташқи ишлар вазири Сергей Лавров Украина президент Владимир Путиннинг Новгород областидаги Валдай қароргоҳига дронлар билан ҳужум уюштиргани ҳақида гапирди. Лавров бу сўзларига ҳеч қандай далил келтирмаган. Бу маълумот мустақил манбалар томонидан тасдиқланмаган.

«2025 йил 28 декабрдан 29 декабрга ўтар кечаси Киев режими РФ президентининг Новгород областидаги давлат қароргоҳига 91 та учувчисиз учиш қурилмасидан фойдаланган ҳолда террорчилик ҳужумини амалга оширишга ҳаракат қилди», – деган Лавров Москвада журналистларга. Унинг сўзларига кўра, жабрланувчилар ва етказилган зарар ҳақида маълумот келиб тушмаган.

РФ мудофаа вазирлиги Россия ҳаво ҳужумидан мудофаа кучлари украинларнинг 91 та дрони уриб туширилгани, шундан 41 таси Новгород области осмонида, 49 таси – Брянскда, яна биттаси – Смоленск устида тўхтатилганини маълум қилган.

Лавров Россия бу ҳодисага жавоб қайтаришини айтган. «Бундай ўйловсиз ҳаракатлар жавобсиз қолмайди. РФ қуролли кучларининг жавоб зарбалари бериладиган объектлар ва уларни амалга ошириш вақти белгилаб олинган», – деган у.

РФ ТИВ раҳбари Россия музокаралардаги ўз позициясини ўзгартиришини ҳам айтган:

Ушбу акция Украина можаросини ҳал қилиш бўйича Россия ва АҚШ ўртасидаги қизғин музокаралар чоғида амалга оширилди. Биз АҚШ билан музокаралар жараёнидан чиқмоқчи эмасмиз. Шу билан бирга, давлат терроризми сиёсатига ўтган жиноий Киев режимининг якуний қайта туғилишини ҳисобга олган ҳолда, Россиянинг музокаралар позицияси қайта кўриб чиқилади.

РФ президенти ёрдамчиси Юрий Ушаковнинг айтишича, Владимир Путин 29 декабр куни бўлиб ўтган телефон мулоқоти чоғида бу ҳақда АҚШ президенти Доналд Трампга ҳам хабар берган. Ушаков Америка раҳбари Украина Путиннинг қароргоҳига ҳужум қилгани ҳақидаги маълумотдан шокка тушган ва ғазаб отига минганини айтган. Ушаковнинг сўзларига кўра, Трамп «бундай телбавор ҳаракатлар»ни ҳатто тахмин ҳам қила олмаслиги ҳақида гапирган.

Украинадагилар нима демоқда?

Украина президенти Володимир Зеленский Лавровнинг баёнотини «РФнинг навбатдаги ёлғони» деб атади. Унинг сўзларига кўра, Россия бундан Киевга зарба бериш учун баҳона сифатида фойдаланмоқчи.

«Россия Федерациясининг навбатдаги ёлғони. Кеча [28 декабр куни] Трамп билан учрашувимиз бўлганди. Тушунарлики, агар биз билан Америка ўртасида можаро чиқмаса, бизда ўсиш кузатилса – бу руслар улар учун муваффақиятсизлик. Чунки улар бу урушни тугатишни истамайди. Уни фақат уларга босим ўтказиш орқали тугатиш мумкин. Менимча, улар тугатмаслик учун баҳона излаган, бунга ишончим комил», – деди Зеленский журналистларга.

Украина президенти Россиянинг баёнотини «жуда хавфли» деб атаган. Унинг фикрича, бу Украина ва АҚШнинг Россия-Украина урушини ҳал қилиш бўйича барча ютуқларини барбод қилиши мумкин:

Россияликлар гўёки Россия диктаторининг қайсидир қароргоҳига зарба берилгани ҳақида ёлғон ҳикоя ўйлаб топишди, шунда улар Украинага, хусусан, Киевга зарба беришни давом эттириш учун асосга эга бўлишади, шунингдек, урушни тугатиш учун зарур чораларни кўришдан бош тортишади. Русларнинг одатий ёлғон тактикаси. Бундан ташқари, улар аллақачон Киевга, хусусан, Украина Вазирлар Маҳкамаси биносига зарба берганди.

Ўз навбатида, Украина ТИВ раҳбари Андрей Сибига Россия бу ҳикояни фақат битта сабаб билан «тўқиб чиқаргани»ни айтган: Россиянинг Украинага кейинги ҳужумлари учун баҳона яратиш, шунингдек, тинчлик жараёнига путур етказиш ва тўсқинлик қилиш».

Вазир Украина «Россиянинг Украина бўйлаб зарбаларига жавобан фақат Россия ҳудудидаги ҳарбий объектларга зарба бераётгани»ни билдирган.

АҚШдагилар нима дейди?

АҚШ президенти Доналд Трамп Оқ уйда Исроил делегацияси билан учрашув олдидан журналистлар билан мулоқот чоғида шу мавзу юзасидан фикр билдирди. АҚШ президентининг сўзларига кўра, у бу ҳақда Владимир Путин билан 29 декабр кунги телефон мулоқоти чоғида хабар топган.

«Бу менга ёқмайди. Бу ёмон. Мен бу ҳақда бугун эрталаб билдим. Бу ҳақда менга президент Путин айтиб берди. Эрта тонгда у ўзига ҳужум қилишганини айтди. Бу ёмон. Бу ёмон. Ёдда тутинг, мен [Украинага] „Томагавк“ етказиб берилишини тўхтатгандим, мен буни хоҳламагандим», – деган Трамп.

Шу билан бирга, Трамп АҚШ дронлар ҳужуми чиндан ҳам бўлганми-йўқми, бунга аниқлик киритишини айтди. «Сиз „балки ҳужум бўлмагандир“ деяпсиз, бўлиши мумкин. Лекин президент Путин бугун эрталаб менга ҳужум бўлганини айтди», – деди Трамп журналист аёлнинг шу ҳақдаги саволига жавоб бераркан.

АҚШ президенти бу «нозик даврда» рўй берганини қўшимча қилган:

Ҳозир бунинг мавриди эмас. Улар тажовузкор бўлгани учун тажовузкор бўлиш бошқа. Унинг уйига ҳужум қилиш – бошқа гап. Ҳозир бундай ишларнинг вақти эмас. Бундай қилмаслик керак. Мен буни президент Путиндан эшитдим. Мен бундан қаттиқ ғазабландим