Курск областида ҳам кўприк қулади

1 июнга ўтар кечаси Курск областида темирйўл кўприги қулаб тушди, деб хабар берди регион губернатори вазифасини бажарувчи Александр Хинштейн.

Фавқулодда ҳолат Железногорский райони ҳудудида, Тросна-Калиновка трассасининг 48-километрида рўй берган. Мулозимнинг сўзларига кўра, кўприк юк локомотив ҳаракати вақтида қулаган, поезднинг бир қисми кўприк остидаги автомобил йўлига тушган. 

Натижада тепловоз ёниб кетган, ёнғин тезда бартараф этилган.

Тепловоз машинистлари бригадаси шифохонага етказилган. Улардан бирининг оёғи шикастланган.

Кўприк остидан ўтган автомобил йўлида транспорт ҳаракати тўхтатилган.

Кўприк қулаши сабаблари ўрганилмоқда, дея қўшимча қилган Хинштейн.

31 май куни кечқурун қўшни Брянск областининг Вигоничский районида автомобил кўприги қулади, бу вақтда унинг остидан «Климов — Москва» йўловчи поезди ўтаётганди. Ҳодиса вақтида кўприкдан юк машинаси ҳаракатланган. Натижада локомотив ва тўрт вагон релсдан чиқиб кетган. Етти киши ҳалок бўлиб, яна 66 киши жабрланган. Жароҳатланганлардан 47 нафари шифохонага ётқизилган, улардан уч нафари, жумладан, бир бола оғир аҳволда қолмоқда.