Самарқандда ҳисобчи тадбиркорнинг 6,4 млрд сўмини онлайн қиморда ютқазиб қўйди

У банк электрон калитларидан фойдаланиб, МЧЖ маблағларини сохта маълумотларни расмийлаштириш орқали ўзининг номига очилган пластик карталарга ўтказиб олишга эришган.

Самарқанд шаҳрида тадбиркорнинг 6,4 миллиард сўм маблағини қимор ўйинларига ютқазган ҳисобчи аниқланди, деб хабар беради Бош прокуратура ҳузуридаги департамент.

Қайд этилишича, департаментнинг Самарқанд шаҳри бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Текширувда «Ph.l» МЧЖда ҳисобчи лавозимида ишлаган Б.М. банк электрон калитларидан фойдаланиб, МЧЖнинг 6,4 миллиард сўм маблағини сохта маълумотларни расмийлаштириш орқали ўзининг номига очилган пластик карталарга ўтказиб олишга эришиб, ушбу маблағларни интернет тармоқларидаги қимор ўйинларида ютқазиб, талон-торож қилгани аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Шофирконда 16 ёшли ўсмир ўндан ортиқ шахслар номига онлайн кредит расмийлаштириб олгани аниқланган эди. PayNet шохобчасида ишлаган бола фуқароларга сим-карта бериш жараёнида уларнинг фотосуратларини идентификациядан ўтказиш учун олган. Сўнгра яширин равишда уларнинг телефон рақами ва фотосуратларидан фойдаланиб, “Анорбанк” иловасидан онлайн кредит расмийлаштирган.

Тайёрлаган: Фозилбек Юсупов

#Самарқанд #қимор