“Кичкина хонада 6 киши яшаяпмиз” – Тошкентда қурилиш фирмаси юзлаб одамнинг уйини вақтида топширмади

“City oil” МЧЖ Бектемир тумани Иқбол маҳалласидаги қурилиш объектини ваъда қилинган муддатда топширмади. Қурилиш ва уй-жой коммунал хўжалиги соҳасида назорат қилиш инспекцияси фирма тегишли ҳужжатларсиз иш бошлагани учун қурилиш жараёнларини тўхтатиб қўйган. Шу йилнинг декабрида фойдаланишга топширилиши керак бўлган кўп қаватли уй қурилиши ҳали бошланмаган.

{Yii::t(}

Ўтказиб юбориш 6s

Ўтказиб юбориш

2019 йилда Тошкент шаҳри ҳокими қарори билан “City oil” МЧЖга Бектемир туманининг Иқбол маҳалласи ҳудудидан кўп қаватли уй қуриш учун 70 сотих ер майдони ажратиб берилган. 2018 йил давлат рўйхатидан ўтган, таъсисчилари “Maryam fayz” МЧЖ ва Зоҳидова Гулноза Зокиржоновна бўлган “City oil” МЧЖ эса квартираларни шартнома муддатида топширолмаяпти.

Инвесторларнинг сўзларига кўра, қурилиш ишлари 2019 йилда бошланган. Аммо тузилган шартномаларда хонадонни топшириш муддати ҳар хил, бирида 2022 йил, бошқасида 2023 йил қилиб кўрсатилган.

“2023 йил сентябр ойида ушбу фирмани топганман. “City oil” қурилиш компаниясининг фирмаси кўп: “Maryam fayz”, “Ekolider”. Шу йилнинг биринчи чорагида ўз уйларини сотувга қўйишган. 50 фоизини тўлаганман. Қолганини икки йил давомида ойма-ой бўлиб тўлашга шартнома тузилган. Бизларники ҳали қурилмаган, котлован ҳолатида ётибди. Уйни 2025 йилда топширамиз дейишган”, дейди фуқаро Ойбек Эгамбердиев.

Унга кўра, қурувчи 15-20 кунда иш бошлашини айтиб келади. Бироқ натижа йўқ.

Бошқа бир инвестор Абдураҳмон Маматқулов ҳам қурилиш ишлари режа бўйича кетмаётганини билдирди. Унинг уйи шартнома бўйича 2022 йил мартида топширилиши керак бўлган.

“2021 йил феврал ойида тўлов қилганмиз. 128 млн сўм тўладим. 1 йилда топшириши керак эди. Мана, шуниям қил-қил, деб зўрға қурдирганмиз. Бизларга фасадни қилиб берамиз, кириб яшайсизлар, деб ваъда беришганди. Ҳеч қанақа иш кетаётгани йўқ. Тўхтаб қолган, том ва фасад охиригача қилинмаган, умуман ишчилар йўқ. Ҳозир кўпчилик ойига 300-400 доллар тўлаб ижарада яшайди. Сўрасак “бўлди, эртага, индинга” дейди. 3 нафар ходимини қўйиб қўйган”, дейди Абдураҳмон Маматқулов.

Фуқаро Азима Газиеванинг айтишича, ҳокимият ва вазирлик уй учун тўловларни тўламай туришга чақирган.

“2023 йил июнда 2 нафар укам ва ўғлимга 50 фоиздан 3 та хонадонга тўлов қилдик. Ҳозирги кунгача ҳар бир хонадонга 240 млн сўмдан тўлаб қўйдик. Ҳокимият ва вазирлик ҳозирча тўловларни тўламанглар, деди. Уларнинг офисига бориб, қачон менинг блокимга келиб, қурилиш бошланса, ўшанда тўлайман, дея хат ҳам ёздириб келдим. Бу йил декабрда топшириши керак эди. Котловани ҳам йўқ.

Менга яқинда почта орқали хат келди: шартномани бир тарафлама бекор қилишмоқчи экан. Офисига бордим. Нима учун, десам, “Сен агитаторсан, одамларни йиғиб, вазирликка борасан, шикоят қиласан, бизларга тўсқинлик қиляпсан”, дейишмоқда. Ўша учун менга жарима солмоқчи, яна ички ишларга менинг устимдан ёзяпти. Нима учун? Мен ногирон бўлсам, ўзимизнинг ҳаққимизни талаб қиляпмиз”, дейди аёл.

У юқори ташкилотларга қилган мурожаатлари самара бермаганини, ишчилар хўжакўрсинга 1-2 кун ишлаб кетаётганини айтди. Азима Газиева рекламага ишониб ушбу фирмадан хонадон сотиб олган. Ҳозирда риелторлик компанияси тўланган пул маблағларини ундириб беришни маълум қилган.

“Улар бизга фақат пулларингни ундириб бера оламиз, деб алоқага чиқишди. Шуни ҳам 5-6 йилда бўлиб-бўлиб картамизга ташлаб бераркан. Қурилиш-чи, бизларга уй керак, десак, “Йўқ, ҳали 2030 йилда ҳам уйинглар бўлмайди”, деди. Шартнома бўйича “City oil”нинг директори Илҳом Саломов. Кейин эшитсак, у қамалди, ўтириб ҳам чиқди. 3 нафар директор алмашди”, дейди у.

Фуқаро Адолат Усмоновага ҳам шу йил декабр ойида хонадон топширилиши керак эди. У уй учун 200 млн сўмдан ортиқ пул тўлаган. Аммо унинг уйи қурилиши ҳали бошланмаган.

“Болалар тўлагани учун мен аралашмагандим. Ўғлим, келиним, 3 та неварам билан бир хонали ётоқхонада турамиз. Кичкина хонада 6 киши яшаяпмиз. Ҳамма келинимдан “қайнонангиз қаерда ётади?” деб сўраркан. Ўзимдан ҳам сўрашади. Ошхонада ётаман”, дейди Адолат Усмонова.

Унинг қўшимча қилишича, “City oil” МЧЖ собиқ раҳбари Илҳом Саломовнинг судлангани қурилиш ишларига таъсир қилган.

Kun.uz мухбири МЧЖнинг ҳозирги раҳбари Баҳром Йўлдошев билан боғланди. У инвесторлар билан қўшимча шартномалар тузилишини, қурилиш ишлари тез кунларда бошланишини маълум қилди.

“Ҳозир тайёр бўлган 4 подъезд биномиз бор. Шуни давлат рўйхатидан ўтказиш керак. Айни пайтда бу бўйича чора-тадбир ўтказиляпти. Бу бўлмагунча қолган босқичларини бошлашга ҳаққимиз йўқ. “Госприёмка”ни 1,5 ойда қиласизлар, кейин қолганига рухсат берамиз, дейишган. Режа-график асосида қолган блокларимизда ишлар 15 сентябрдан бошланади. Қуриб битказилган 4 подъездли бинони 15 сентябргача аҳолига топширамиз. Инженерлик тармоқлари ва қуёш батареяларини ўрнатсак бўлди. Ички пардозлаш ишлари тугади, топширишга тайёр ҳолатда. Қуёш батареясига буюртма берганмиз, тайёр бўлиб қолибди, ўзлари келиб, монтаж қилиб кетади, бошқа иш қолмади”, дейди Баҳром Йўлдошев.

МЧЖ раҳбарининг қўшимча қилишича, жорий йил декабрда топширилиши керак бўлган кўп қаватли уйлар 2026 йил авгуcтигача қуриб битказилади: қурилиш ишларини амалга ошириш учун фирма маблағи етарли.

Қурилиш ва уй-жой коммунал хўжалиги соҳасида назорат қилиш инспекцияси “City oil” олиб бораётган қурилиш рўйхатдан ўтмагани учун тўхтатилганини билдирди. “City oil”нинг кенгаш хулосаси, экспертизаси йўқ”, дейилади инспекция ахборотида.

Шаҳзод Ўроқбоев,
Kun.uz