1 январдан тасдиқланган қурилиш объектларига қўшимча ўзгартиришлар киритиш тақиқланади

2026 йил 1 январдан қурилиши бошланган кўп қаватли уй-жойларга қўшимча қават қўшиш ёки баландлигини ошириш учун лойиҳани қайта ишлаб чиқиш ва экспертизадан ўтказиш тақиқланади.

Фото: Kun.uz

«Бино ва иншоотларнинг зилзилабардошлиги ва сейсмик хавфсизлигини таъминлашда давлат назорати ва бошқарувини янада такомиллаштириш чора-тадбирлари тўғрисида»ги президент фармонига мувофиқ, 2026 йил 1 январдан бир қатор янги тартиблар жорий этилади.

Хусусан, қурилиши бошланган кўп квартирали уй-жойларга қўшимча қават қўшиш ёки баландлигини ошириш мақсадида шаҳарсозлик ҳужжатларини ишлаб чиқиш, тегишли архитектура-шаҳарсозлик кенгашларида кўриб чиқиш, экспертизадан ва қайта рўйхатдан ўтказиш тақиқланади.

Шунингдек, Қурилиш ва уй-жой коммунал хўжалиги соҳасида назорат қилиш ҳудудий инспекцияларидан белгиланган тартибда рухсат олинмасдан қурилаётган объектларни ташқи муҳандислик тармоқларига улашга рухсат берилмайди.

Объектларнинг зилзилабардошлиги бўйича илмий ҳамда лойиҳа ҳужжатларининг смета қисмидан ташқари шаҳарсозлик ҳужжатлари экспертизаси хулосаларини тавсиявий тарзда бериш амалиёти тугатилади, улар қарор қабул қилиш учун мажбурий аҳамият касб этади.