КХДР АҚШга етиб бора оладиган ракеталар устида ишлаяпти

Ким Чен Ин шахсан шундай ракета двигатели синовини кузатди, у, таъкидланишича, КХДРга АҚШ ҳудудидаги нишонларни уриш имконини беради. Бир қатор экспертлар эса бу даъвони бўрттирилган деб ҳисобламоқда.

Фото: KCNA/REUTERS

Шимолий Корея давлат оммавий ахборот воситалари 29 март, якшанба куни, такомиллаштирилган реактив ракета двигатели синовдан ўтказилганини маълум қилди. Билдирилишича, ушбу двигател АҚШ ҳудудидаги нишонларга етиб бора оладиган ракеталар учун мўлжалланган. Ерда ўтказилган синов жараёнини КХДР олий раҳбари Ким Чен Ин шахсан кузатган ва у бу ишланмани мамлакат стратегик ҳарбий арсеналини мустаҳкамлайдиган “муҳим ютуқ” деб атаган, деб хабар берди AP агентлиги.

Корея Марказий ахборот агентлиги маълум қилишича, композит углерод материалидан ишланган ушбу двигателнинг энг юқори тортиш кучи 2500 килонютонни ташкил қилади. Бу ўтган йил сентябр ойида қаттиқ ёнилғили двигателнинг шунга ўхшаш синовлари чоғида Шимолий Корея ОАВ келтирган 1970 килонютонлик кўрсаткичдан юқоридир.

Пхенян манёврли, АҚШ ва унинг иттифоқчилари томонидан тутиб қолиниши қийинроқ бўлган ракеталарни яратишни мақсад қилганини билдирган бўлса-да, бундай двигател ракетага шунчалик узоқ масофага учиш имконини бериши ҳақидаги даъволар бўрттирилган бўлиши мумкин, дея қайд этади экспертлар. Шу билан бирга, AP таъкидлашича, қаттиқ ёнилғили ўрнатилган двигателга эга ракеталарни суюқ ёнилғили ракеталарга нисбатан кўчириш ва учириш олдидан яшириш осонроқ бўлади.