“Олтин аср” риторикаси: Трамп йиллик нутқида ўз сиёсатини мақтади

АҚШ президенти Доналд Трамп ўзининг ҳозирги сиёсий йўналишига “Американинг олтин асри”ни ва мамлакат тарихида рекорд даражадаги ютуқларни боғлади. Унинг айтишича, бу ютуқлар “ҳеч ким ҳеч қачон кўрмаган трансформация” ва “асрларга татигулик бурилиш”га олиб келган. АҚШ раҳбари буни АҚШ Конгрессининг Вакиллар палатаси ва Сенати олдида чоршанба куни, 25 февралда, мамлакатдаги вазият ҳақидаги йиллик мурожаат билан чиқиш қилган пайтда айтди.

“Миллатимиз қайтди — ҳар қачонгидан ҳам каттароқ, яхшироқ, бойроқ ва кучлироқ. Бу — Американинг олтин асри”, — деди Трамп. АҚШ президенти ўз лавозимида бўлган бир йилдан кейин муваффақиятларни ҳамма соҳада кўраётганини билдирди: унинг фикрича, АҚШ чегаралари ҳимояланган, “иқтисодиёт ҳар қачонгидан ҳам гуллаб-яшнамоқда”, “Американинг душманлари эса қўрқувда”.

Ички сиёсатда Трамп иқтисод соҳасидаги ютуқларни ўз ҳисобига ёзди: бензин нархларининг пасайиши, инфляция даражасининг барқарорлашиши ва уй-жой бозоридаги вазият гўё яхшиланаётгани. Шунингдек, у дунёнинг аксар мамлакатларидан келадиган товарларга бож жорий этган қарорини ҳам мақтаб, келажакда бу божлардан тушадиган даромад америкаликлар даромад солиғи тўлайдиган тизимни алмаштириши мумкинлигини айтди.

Трампнинг сўзларига кўра, унинг бошқарувидаги бир йилда АҚШга 18 трлн доллардан ортиқ маблағ жалб қилинган. Аммо CNN шарҳловчиси Дэниел Лэйн таъкидлашича, бу даъво ҳақиқатдан йироқ: ҳатто Оқ уй ҳам ўз сайтида “инвестиция ҳақидаги баёнотлар” суммасини 9,7 трлн доллар деб баҳолайди, бунда гап аниқ мажбуриятлар эмас, айнан баёнотлар ҳақида кетмоқда.

АҚШ президентининг миллатга мурожаатининг бир қисми ташқи сиёсатга бағишланди. Масалан, Трамп 2023 йил октябрда ҲАМАС гуруҳи Исроилга ҳужум қилган пайтда ўғирлаб кетилган исроиллик гаровга олинганларни асирликдан қайтаришни ўз ютуғи сифатида тилга олди.

Трамп яна “саккизта урушни тугатгани” ҳақидаги баёнотларини такрорлади. У Россиянинг Украинага қарши тўлақонли урушини фақат юзаки тилга олди, гарчи нутқ айтилган сана Россия қўшни давлатга бостириб кирганининг тўрт йиллигига тўғри келган бўлса ҳам. Трампнинг айтишича, унинг маъмурияти урушни тугатиш учун “улкан саъй-ҳаракат” қилмоқда.

Аввалгидек, Трамп яна шундай деди: агар у президент бўлганида, Россиянинг Украинага қарши уруши ҳеч қачон бўлмас эди.

АҚШ президенти Конгресс олдида нутқ сўзлашидан олдинроқ, Вакиллар палатаси мажлислар залидаги аъзолардан бири — демократ Эл Грин залдан чиқариб юборилди. У залда “Қора танлилар — маймун эмас!” деган ёзувли плакатни кўтариб чиққан. Бу Трамп ўз шахсий ижтимоий тармоғидаги саҳифасида Обамалар жуфтлигига қарши ҳақоратомуз карикатурали видеони жойлаганига ишора қилади.

Бугунги АҚШдаги муаммоларни санаб ўтар экан, Трамп деярли барча ҳолатларда бу муаммолар пайдо бўлишида демократларни айблади — ноқонуний миграциядан тортиб уй-жой нархларигача. Демократик партия аъзолари эса президент миграцияга қарши кураш мавзусини кўтарганда уни трибунадан туриб ҳуштак билан “ҳайқириб” қарши олгани айтилган. ОАВ қайд этишича, Трамп 1,5 соатдан ортиқ давом этган нутқида “депортация” сўзини фақат бир марта ишлатган — эҳтимол, ICE хизмати ходимларининг ҳаракатлари оқибатида АҚШ фуқаролари ҳалок бўлган ҳолатларни муҳокама қилмаслик учун.

Трамп нутқи пайтида АҚШ Конгресси биноси олдида президент сиёсатига қарши чиққан намойишчилар тўпланди. Кўзга кўринган шиорлар орасида “Доналд Даҳшатли(нинг) ақлсиз бошқаруви”, “Муҳожирлар — жиноятчи эмас, президент — ҳа”, ва “Трампутин” кабилари бўлган.