Туркиядаги курортда чиққан ёнғин қурбонлари сони ошмоқда

12 қаватли Grand Kartal меҳмонхонасидаги ёнғин маҳаллий вақт билан соат 03:27 да бошланган. Шу кунларда Туркиядаги мактаблар икки ҳафталик таътилга чиққан ва бу давр тоғ-чанғи мавсумининг авж палласи ҳисобланади, шу туфайли меҳмохонада шу куни 234 киши тунаган.

Меҳмонхона биноси ёғочдан қурилгани сабабли, олов тез тарқалган. Ёнғинни ўчириш ишларига 200 дан ортиқ қутқарувчилар иштирок жалб этилган.

Болу губернатори Абдулазиз Айдин дастлабки маълумотларга кўра, ёнғин меҳмонхонанинг тўртинчи қаватидаги ресторанлар ҳудудида чиққан ва юқори қаватларга тарқалган. Меҳмонхона Болу марказидан анча узоқда жойлашган. Натижада ўт ўчирувчилар ноқулай об-ҳаво шароитида воқеа жойига етиб бориши учун бир соатдан ортиқ вақт кетган.

Қутқарув ишлари тонгда ҳам давом эттирилган ва эрталабки хабарларда қутқарувчилар ҳамон меҳмонхонанинг айрим нуқталарига етиб боришга уринаётгани айтилганди.

Маҳаллий нашрларга кўра, камида икки киши меҳмонхона деразаларидан сакраб ҳалок бўлган. Айримлар чойшабдан қилинган арқонлар ёрдамида деразадан чиқишга уринган.

Чанғи инструктори Нежми Кепчетутан маҳаллий телевидениега меҳмонхонани яхши билгани туфайли омон қолгани, унинг йўлаклари билан яхши таниш бўлмаган мижозларнинг эса омади келмаганини айтиб ўтган.

«Одамлар деразалардан қараб: „Бизни қутқаринг“ дея қичқиришди, чунки ичкарини кучли тутун қоплаганди. Биз 20-25 кишини олиб чиқдик», — деган у NTV телеканалига.

Ёнғин сабаблари ҳозирча номаълум. Адлия вазири Йилмаз Тунч махсус комиссия экспертлари ҳодиса сабабларини ўрганаётгани, текширув ишларига прокуратура ходимлари ҳам жалб этилганини маълум қилган. Унинг айтишича, меҳмонхона эгаси ва яна уч-тўрт киши ҳибсга олинган.

Туркия президенти Ражаб Тоййиб Эрдўған қурбонларнинг оила аъзоларига ҳамдардлик билдирган.

Карталкая тоғ-чанғи курорти Истанбулдан тахминан 270 километр узоқликда бўлиб, Кероглу тоғлари ҳудудида жойлашган машҳур дам олиш маскани саналади.