Абдулазиз Комилов Италия ордени билан тақдирланди

Ўзбекистон президентининг ташқи сиёсат бўйича махсус вакили, давлат раҳбари ҳузуридаги Хавфсизлик кенгаши котибининг ўринбосари Абдулазиз Комилов «Италия Республикаси олдидаги хизматлари учун» ордени офицери» (Ordine al Merito della Repubblica Italiana) мукофоти билан тақдирланди.

Бу ҳақда Италия президенти бош котибиятининг Gazzetta Ufficiale ҳукумат газетасининг расмий сайтида эълон қилинган пресс-релизда маълум қилинди.

Рўйхатга Италия ва хорижий давлатлардаги бошқа таниқли шахслар ҳам киритилган.

Италиянинг Италия Республикаси олдидаги хизматлари учун» ордени олий давлат мукофоти бўлиб, 1951 йил 3 мартда таъсис этилган. У адабиёт, санъат, иқтисодиёт, хайрия, ижтимоий ва гуманитар фаолият соҳаларида миллат олдидаги салмоқли хизматлари учун Италия фуқаролари ва хорижликларни тақдирлашга мўлжалланган. Мукофот Италия президенти томонидан вазирлар кенгаши раисининг розилиги билан одатда йилига икки марта: 2 июн (Республика ташкил топган кун) ва 27 декабр (Конституция куни)да берилади.