Путин: Украина чекинса – уруш тўхтайди, чекинмаса – уруш давом этади

Россия президенти Владимир Путин Қирғизистонга ташрифи якунлари бўйича ўтказилган матбуот анжуманида Россия-Украина можаросини ҳал қилиш бўйича АҚШ тинчлик режаси атрофидаги мунозарага батафсил тўхталиб ўтди. Қуйида унинг сўзларини жузъий таҳрирлар билан қисқартирилган кўринишда келтирилади.

Трампнинг тинчлик режаси ҳақида

Ҳеч қандай «тинчлик келишуви лойиҳалари» бўлмаган. Менинг Аляскага ташрифимдан олдинроқ тузиб чиқилиши керак бўлган саволлар тўплами бор эди. Шундан кейин 28 банддан иборат эҳтимолий келишувлар рўйхати пайдо бўлди ва у бизга муайян каналлар орқали узатилди. Шундан кейин Женевада АҚШ ва Украина ўртасида музокаралар бўлиб ўтди. Билишимча, улар бу 28 банднинг барчасини тўртта алоҳида таркибий қисмга ажратиш керак, деган қарорга келишган. Буларнинг барчаси бизга етказилган. Умуман олганда, бу келажакдаги келишувларга асос бўлиши мумкин, деган фикрга қўшиламиз. Қандайдир якуний вариантлар ҳақида гапириш мен томонимдан одобсизлик бўларди, чунки улар йўқ.

Ўт очишни тўхтатиш ҳақида

Украина қўшинлари эгаллаб турган ҳудудлардан чиқиб кетсин – ана шунда ҳарбий ҳаракатлар тўхтайди. Чиқмаса – биз буни қуролли йўл билан амалга оширишга эришамиз, тамом вассалом.

Оккупация қилинган ҳудудлар мақоми ҳақида

Халқаро-ҳуқуқий тан олиш муҳим аҳамиятга эга. Ҳудудлар Россия суверенитети остида бўлганида тан олиш – бошқа гап, агар келишувлар бузилса, бу РФга барча жавоб чораларини келтириб чиқадиган ҳужум сифатида кўрилади. Ёки бу қонунан Украинага тегишли ҳудудни қайтариб олишга уриниш бўлади. Булар бошқа-бошқа нарсалар.

Шунинг учун, албатта, биз учун тан олиниш муҳим. Аммо Украина томонидан эмас. Бу АҚШ билан музокаралар мавзуси бўлиши керак, бу муҳим нуқталардан биридир.

Европага эҳтимолий ҳужум ҳақида

Эс-ҳуши унчалик жойида бўлмаган одамлар ёки қандайдир фирибгарлар ўз аҳолисига очиқчасига Россия Европага ҳужумга тайёргарлик кўраётгани ва зудлик билан мудофаа салоҳиятини кучайтириш кераклигини айтмоқда. Улар нимага асосланганини айтиш қийин, лекин бизнинг нуқтайи назаримизга кўра, бу мутлақо бемаънилик, бу қип-қизил ёлғон. Агар улар ўз фуқароларини қўрқитган бўлса ва улар [Европа мамлакатлари фуқаролари] бизнинг Европага нисбатан ҳеч қандай тажовузкор режаларимиз йўқлигини эшитмоқчи бўлса, марҳамат: биз буни «қоғозга тушириб» тасдиқлашга тайёрмиз.

Россия G7’​​га қайтиши ҳақида

Биз «катта еттилик»ка қарши эмасмиз. Улар тобора кичрайиб бормоқда, аммо улар барибир муҳим ҳамкорлардир. Лекин бизни у ерга ҳеч ким таклиф қилмаяпти. Бугунги вазиятда улар билан қандай тўғридан тўғри мулоқот қилишимизни тасаввур қила олмаяпман. Ўзингиз тасаввур қиляпсизми? Хўш, етиб келдик, «салом» бердик, кейин нима қиламиз – қовоқ уйиб, бир-биримизга қараб ўтирамизми? Балки бу таклифларнинг барчасини [тинч йўл билан ҳал қилиш бўйича] амалга оширсак, кўп томонлама алоқалар учун шароит яратилар, лекин бу ҳақда гапиришга ҳали эрта.

Россия активлари мусодара қилиниши ҳақида

Бу жаҳон молия тизими учун салбий оқибатларга олиб келиши аниқ, чунки евроҳудудга бўлган ишонч кескин пасаяди, кескин тушиб кетади. Европа иқтисодиётидаги қийинчиликлар фонида эса бу осон синов бўлмайди. Менинг топшириғимга биноан, Россия ҳукумати бундай ҳолат учун жавоб чоралари тўпламини ишлаб чиқмоқда. Бу бировнинг мулкини ўғирлаш бўлиши барчага аён ва буни ҳамма очиқ-ойдин айтяпти.

Россиялик музокарачилар ҳақида

Россия томондан музокарачи ким дейсизми? Бу очиқ маълумот – Ташқи ишлар вазирлиги. Кремль томонидан эса – Владимир Мединский – президент ёрдамчиси, у бу иш билан аввалбошдан шуғулланган. Жорий ишлар бўйича менинг ёрдамчим – Юрий Ушаков ишга қўшилган, у америкалик ҳамкасблари билан алоқада. Аммо буларнинг барчасини бир ўзи қила олмайди, буни ТИВ ва қисман президент маъмурияти қилиши керак. Бу жуда катта масалалар мажмуаси.

Сергей Лавров «қаҳрга йўлиққани» ҳақида

Бу қандайдир бемаънилик, у ҳеч қандай хатога йўл қўймаган. Унинг ўз иш жадвали бор, у менга нима билан шуғулланиши, қайси вақтда шуғулланиши бўйича ҳисобот берди. Америкалик ҳамкорлар билан учрашувга тайёргарлик кўрмоқда.

Уиткофф билан музокаралар матбуотга сизиб чиқиши ҳақида

Уиткоффни айблашнинг ҳожати йўқ. У Америка фуқароси, ўз президенти ва мамлакатининг позициясини ҳимоя қилади. Ҳа, бизда диалог бор, у осон эмас. Биз бу мулоқотни сўкишларсиз, бир-биримизга тупуришларсиз олиб борамиз, биз зиёли одамлармиз, лекин ҳар биримиз ўз позициямизни ҳимоя қиламиз. Уиткофф АҚШ манфаатларини ўзи ва уни музокараларга вакил қилган одамлар қандай кўрса, шундай ҳимоя қилади.

Украина ҳукумати легитимлиги ҳақида

Украина раҳбарияти билан ҳужжатлар имзолашдан маъно йўқ. Мен бу мавзуда кўп марта гапирганман. Менимча, Украина раҳбарияти президентлик сайловларига боришдан қўрқиб, принципиал, стратегик хатога йўл қўйди, шундан сўнг президент ўзининг легитимлик мақомини йўқотди.

Биз ҳам ҳарбий можаро шароитидамиз, лекин сайловларни ўтказдик-ку! Президент сайловларини ҳам, яқинда бўлиб ўтган муниципал ва минтақавий ҳокимият органларига сайловларни ҳам. Биз ҳаммасини қиляпмиз-ку. Улар эса негадир йўқ. Бугунги шароитда Украинанинг амалдаги сиёсий раҳбарияти сохталаштиришларсиз ғалабага умид қилиши қийин.

«Роснефт» ва «Лукойл»га қарши санкциялар ҳақида

Анкориждаги музокаралардан сўнг биз қаерда эканимиз ва ҳарбий ҳаракатларни тўхтатиш учун нима қилиш кераклиги бўйича тушунча шаклланди. Кейин биз тарқалдик, чунки мен ҳам, [Доналд] Трамп ҳам ўз пойтахтларимизга қайтишимиз, ўйлаб кўришимиз, ўз аппаратларимиз, вазирликлар, идоралар, иттифоқчилар билан маслаҳатлашишимиз кераклигини айтдик. Шундан кейин ишни давом эттиришга келишиб олдик. Россия ва АҚШ ўртасида қандайдир зиддиятли вазият юзага келмади. Ва тўсатдан улар иккита нефт компаниямизга қарши санкциялар жорий этилишини эълон қилишди. Бу нима билан боғлиқ? Мен сизга очиғини айтяпман, мен ҳатто тушунмадим ҳам, нима бўляпти ўзи?

Жанг майдонидаги вазият ҳақида

Барча йўналишларда ижобий динамика сақланиб қолмоқда. Бу йўналишларнинг барчасида қўшинларимизнинг ҳаракат суръати ортиб бормоқда. Айтиш мумкин, барча асосий йўналишларда қўшинларимиз томонидан қайтарилаётган ҳудудлар сони ой сайин ортиб бормоқда. Қўшинларнинг ҳаракат суръати тезлашмоқда.