Қримда ҳарбий самолёт қулаб, 30 киши ҳалок бўлди

Ан-26 русумли ҳарбий-транспорт самолёт Қрим осмонида учиш вақтида ҳалокатга учради. Унинг бортида бўлган экипажнинг етти аъзоси ҳамда 23 йўловчидан ҳеч бири омон қолмаган.

«Қидирув-қутқарув гуруҳи Ан-26 самолёти ҳалокатга учраган жойни аниқлади. Воқеа жойидан берилган ҳисоботга кўра, экипажнинг олти аъзоси ҳамда бортда бўлган 23 йўловчи ҳалок бўлган», – дея мудофаа вазирлиги баёнотидан иқтибос келтирган «Интерфакс» агентлиги.

Чоршанба тонгида Россия тергов қўмитаси аниқлик киритиб, ҳодиса оқибатида жами 30 киши ҳалок бўлгани, шундан етти нафари – экипаж аъзолари бўлганини маълум қилди. Ҳолат юзасидан РФ ЖКнинг 351-моддаси (учиш ёки унга тайёргарлик кўриш қоидаларини бузиш) бўйича жиноий иш қўзғатилган.

«Самолётга шикастловчи таъсир бўлмаган. Дастлабки баҳоларга кўра ҳалокат сабаби – техник носозлик», – дейилади мудофаа вазирлиги хабарида.

Мурманск области губернатори Андрей Чибиснинг маълум қилишича, Қримда Ан-26 ҳарбий-транспорт самолёти ҳалокатга учраши оқибатида ҳалок бўлганлар орасида Шимолий флот ҳарбий хизматчилари ҳам борлигини маълум қилди. 

У флотнинг айнан қанча ҳарбийси ҳалок бўлганига аниқлик киритмаган.

Губернатор қурбонларнинг оила аъзоларига ёрдам кўрсатилишини ваъда қилган.

Россия мудофаа вазирлиги 31 март куни соат 18:00 атрофида Ан-26 ҳарбий-транспорт самолёти билан алоқа йўқолганини хабар қилганди.

Самолёт аннексия қилинган Қрим устидан режали парвозни амалга ошираётган бўлган.

ТАСС ва РИА Новости агентликлари манбалари «самолёт қоя урилиб кетгани» ҳақида айтишган.

Бошқа ҳеч қандай тафсилотлар келтирилмаган.

Ан-26 ҳарбий-транспорт самолёти СССР армиясига 1975 йил май ойида қабул қилинган. У 1969–1986 йилларда Киев ва Улан-Удэ авиация заводларида ишлаб чиқарилган. Самолёт ўрта масофаларга қўшин ва техникани ташиш учун мўлжалланган.

Бу сўнгги йилларда Ан-26 иштирокидаги биринчи ҳалокат эмас.

2020 йил сентябрида Украинанинг Харкив области ҳудудида Ан-26 қулаши оқибатида 26 киши ҳалок бўлиб, бир киши тирик қолган. Ҳодиса ўқув-машғулот парвози чоғида рўй берган. Самолёт Чуҳуйив шаҳри атрофига қулаганди.

2021 йил 6 июлда эса Петропавловск-Камчатскийдан Палана қишлоғига йўловчи рейсини амалга ошираётган шундай самолёт қулаган эди. Версиялардан бирига кўра, ҳалокатга ёмон кўриниш шароитида учувчининг хатоси сабаб бўлган бўлиши мумкин. Бортда бўлган 28 кишининг барчаси – 22 йўловчи ва экипажнинг олти аъзоси ҳалок бўлган.

2018 йил март ойида эса Россия Ҳарбий-ҳаво кучларига тегишли Ан-26 самолёти Суриянинг Латақия шаҳрида ҳалокатга учраган эди. Ўшанда бортда бўлган 39 кишининг барчаси ҳалок бўлган. ОАВ маълумотларига кўра, фожиага самолёт закрилкаларининг носозлиги сабаб бўлган бўлиши мумкин, бу эса унинг кескин пастга шўнғишига олиб келган.