Ўзбекистон терма жамоаси JAKO либосларини кияди - ЎФА янги ҳамкор билан шартнома имзолади

Ўзбекистон футбол ассоциацияси терма жамоалар учун сифатли экипировкалар етказиб берувчи бир қатор хориж компаниялари билан музокаралар олиб бориб, якунда Германиянинг машҳур JAKO (ЯКО) компанияси билан ҳамкорлик бўйича келишувга эришди.

Бугун Миллий олимпия қўмитасида Ўзбекистон футбол ассоциацияси ҳамда  JAKO компанияси томонидан ўзаро  ҳамкорлик бўйича келишув имзолаш маросими бўлиб ўтди. 
 
Тадбирда МОҚ президенти, ЎФА 1-вице-президенти Умид Аҳмаджонов, JAKO компанияси вакили Фредди Жон Пол ва терма жамоа бош мураббийи Эктор Купер иштирок этишди.
 
Умид Аҳмаджонов JAKO компанияси билан 3 йиллик шартнома имзоланганини эълон қилар экан, нима сабабдан ушбу компания билан ҳамкорлик қилишга қарор қилинганини айтиб ўтди:
 
«JAKO жаҳонга машҳур компаниялардан бири ҳисобланади. Энди у турли ёшдаги терма жамоалар учун экипировкалар етказиб беради. Эътиборли томони, миллий терма жамоамиз учун бу компания экипировкаларни текинга етказиб беради. Экипировкалар 96 хил нарсадан иборат. Бунинг ичида турли мавсум либослари, оёқ кийимлар ва бошқа аксессуарлар бор. Тез орада JAKO компаниясининг дўконларини ҳам юртимизда очиш режалаштирилган. Мухлислар терма жамоамиз либосларини харид қилиш имкониятига эга бўлишади. Миллий терма жамоамизга янги мураббий олиб келдик, янги компания билан ҳамкорликни бошлаяпмиз. Умид қилиб қоламизки, мазкур келишувимиз самарали бўлиб, терма жамоаларимиз халқаро майдонларда муваффақиятларга эришишади», - деди Умид Аҳмаджонов.
 
Ўз ўрнида JAKO компанияси вакили Фредди Жон Пол Ўзбекистон футбол ассоциацияси билан ҳамкорлик қилишдан мамнун эканини билдириб ўтди. 
 
Терма жамоа бош мураббийи Эктор Купер эса жаҳон бозорида ўз ўрнига эга бўлган JAKO компанияси билан ҳамкорлик бошланаётгани катта аҳамиятга эга эканлигини таъкидлаб, ушбу ҳамкорлик ЎФА ҳамда JAKO учун манфаатли бўлишига умид билдирди.
 
Маълумот учун, JAKO компанияси спорт экипировкалари (либос, оёқ кийим, аксессуарлар) ва инвентарларни ишлаб чиқаришга мўлжалланган компания бўлиб, унга Руди Шпрюгель томонидан 1989 йилнинг 1 ноябрида асос солинган.  
 
Айни вақтда JAKO компаниясининг 40дан ортиқ мамлакатларда филиаллари мавжуд. Компаниянинг бош биноси Германиянинг жануби-ғарбидаги Холленбах округида жойлашган. Ҳозирда Австрия, Бельгия, Голландия, Швейцария каби мамлакатларнинг бир қатор клублари айнан JAKO компанияси билан ҳамкорлик қилади.

Аввалроқ, Ўзбекистон терма жамоаси Adidas билан 2 йиллик шартнома имзолаши ҳақида хабарлар тарқалган эди.

Кеча, 24 октябрь куни Миллий олимпия қўмитасида Ўзбекистон футбол ассоциацияси ва JAKO компанияси томонидан ўзаро ҳамкорлик бўйича келишув имзолангани ҳақида хабар берилган эди. Шундан сўнг, Ўзбекистон футбол ассоциацияси вице-президенти Умид Аҳмаджонов Германиянинг JAKO (ЯКО) компанияси билан эришилган ҳамкорлик келишуви бўйича KUN.UZ мухбирига батафсилроқ маълумот берганди.