Бизнес-омбудсман: Пандемияга қарамай, 2020 йилда тадбиркорларни текшириш атиги 10 фоизга камайди

Бизнес-омбудсман вакили Абдували Абдумавлонов АОКАдаги брифингда ахборот берди. Унинг айтишича, 2020 йилда тадбиркорлик субъектларида 52 мингдан ортиқ текширувлар ўтказилган.

«Биз 2020 йилда тадбиркорлик субъектларида ўтказиладиган текширувлар сонини 2 баробарга қисқартиришни режа қилган эдик. Бизнес-омбудсман томонидан назорат қилувчи органларга пандемия даврида барча текширишларни кескин қисқартириш юзасидан тавсиялар берилган. Аммо текширувларни рўйхатга олиш ягона тизимидан олинган сўнгги маълумотларга қараганда, текширувлар 2020 йилда 2019 йилга нисбатан фақатгина 10 фоизга қисқаргани аниқланди», – деди Абдували Абдумавлонов.

Унинг маълум қилишича, 2021 йил январь ойида 7700 дан зиёд тадбиркорлар фаолиятида текширувлар ўтказилган. Бунга асосий сабаб сифатида солиқ қонунчилигидаги ўзгаришлар кўрсатилган.

Янги ишлаб чиқилган «Тадбиркорлик субъектларини давлат томонидан назорат қилиш тўғрисида»ги қонун лойиҳасида тадбиркорлик субъектларига текширув ўтказиш ташаббуси билан чиқишнинг янгича механизмлари кўриб чиқилган ва таклифлар берилган.

Қонун лойиҳасида давлат органлари томонидан тадбиркорларни назорат қилишнинг аниқ 4 хил шакллари: назорат тадбирлари, мониторинг, статистика ва бошқа ахборотларни таҳлил қилиш ва текширувларни ўтказиш белгилаб берилган.

Аввалроқ, тадбиркорлик фаолиятини назорат қилувчи органлар ва уларнинг назорат функцияларининг рўйхати шакллантирилиши маълум қилинганди.

Шунингдек, 2021 йилнинг охиригача Тадбиркорлик кодекси ишлаб чиқилиши ва кодексда тадбиркорликка оид лицензиялаш, рухсатнома бериш, ер ажратишга доир масалалар ҳам аниқ тартибда белгилаб берилиши кўзда тутилган.

2020 йилда тадбиркорлик фаолиятини ноқонуний текширган 328 нафар мансабдор шахс жиноий жавобгарликка тортилган.