Трамп ортидан Путин ҳам Хитойга ташриф буюради

Доналд Трампнинг Пекинга ташрифидан бир неча кун ўтиб, Россия президенти ҳам у ерга йўл олмоқда. Кремлга кўра, Путиннинг ташрифи Си Жинпинг таклифи билан амалга оширилмоқда ва «яхши қўшничилик»ка оид шартноманинг 25 йиллигига бағишланади.

Путиннинг Пекинга ташрифи – май, 2024 йил / Фото: AP

Россия президенти Владимир Путин Хитой Халқ Республикаси раиси Си Жинпиннинг таклифига биноан 19–20 май кунлари Хитойга навбатдаги расмий ташрифни амалга оширади. Кремл хабарига кўра, учрашув давомида улар “икки томонлама муносабатлар, мамлакатлар ўртасидаги ҳар томонлама шериклик ва ҳамкорликни мустаҳкамлаш” масалаларини муҳокама қилади. Сафарнинг ўзи эса «Яхши қўшничилик, дўстлик ва ҳамкорлик тўғрисида»ги шартноманинг 25 йиллигига бағишланган.

Путин ва Си шунингдек «муҳим халқаро ва минтақавий муаммолар бўйича фикр алмашиш« ниятида. Музокаралар якунида эса қандайдир қўшма баёнот имзоланиши режалаштирилган. Ташриф доирасида Путин Хитой Давлат кенгаши бош вазири Ли Сян билан ҳам учрашади. Унда Москва ва Пекин ўртасидаги иқтисодиёт ва савдо сиёсати соҳасидаги ҳамкорлик ҳақида сўз боради.

Путин Хитойга мунтазам равишда бориб туради

Кремл раҳбарининг Хитойга сафари АҚШ президенти Доналд Трампнинг ташрифидан атиги бир неча кун ўтиб содир бўлмоқда. Америка президенти ўз делегацияси билан биргаликда Пекиндаги музокараларда икки кун вақт ўтказди.

Дастлаб март ойининг охирига режалаштирилган Оқ уй раҳбарининг ташрифи — Эрон билан уруш сабабли қолдирилганди. Бунгача АҚШ президенти Пекинга 9 йил аввал ташриф буюрганди.

Россия Украинага қарши кенг кўламли уруши бошланганидан кейин Путин Хитойга мунтазам равишда бориб турибди. Хусусан, 2023 йилдан 2025 йилгача Путин ҳар йили Хитойга турли тадбирлар иштирок этиш ва расмий ташрифлар билан келди.

DW нашрининг ёзишича, Украина ташқи ишлар вазири Андрей Сибига ҳам 16 май куни Хитой томонидан таклифнома олганини хабар берган. Улар ҳозирда ХХРга ташриф санасини белгилаш устида иш олиб бормоқда.