Трамп: Эрон музокараларни тиклашни сўради

АҚШ президенти Доналд Трамп The Atlantic нашрига маълум қилишича, Эроннинг янги раҳбарияти ундан музокараларни тиклашни сўраган.

«Улар гаплашиб олишни хоҳлашмоқда ва мен рози бўлдим, шунинг учун мен улар билан гаплашаман. Улар буни эртароқ қилишлари керак эди. Улар қилиш қулай ва осон бўлган ишни олдинроқ қилиши керак эди. Улар чўзиб юборишди», – деган Трамп.

АҚШ президенти музокаралар қачон ўтказилиши мумкинлиги ҳақидаги саволга жавоб бермади.

«Бу одамларнинг аксарияти энди йўқ. Биз билан ишлаганларнинг баъзилари аллақачон ҳалок бўлишди, чунки бу жуда катта зарба эди. Улар буни эртароқ қилишлари керак эди, Майкл. Улар битим тузишлари мумкин эди. Улар буни эртароқ қилишлари керак эди. Улар ортиқча ақллилик қилиб юборишди», – деган Трамп.

АҚШ президенти CNBC учун берган интервюсида Эрондаги амалиёт «графикдан илгарилаб кетгани»ни айтган. «Ҳозир воқеалар жуда ижобий йўналишда ривожланмоқда», – деган Трамп.

Fox News учун интервюсида эса у агар АҚШ ва Исроил Эронга қарши уруш бошламаганида, «улар икки ҳафта ичида ядровий қуролга эга бўлиши мумкин бўлгани»ни айтган. «У ҳолда буларнинг барчаси имконсиз бўлиб қоларди», – дея қўшимча қилади Трамп.

АҚШ ва Исроил 28 феврал куни Эронга қарши уруш бошлашидан олдин Вашингтон ва Теҳрон вакиллари Эрон ядровий дастури бўйича музокаралар олиб борганди. Музокараларда АҚШ Эроннинг ядро қуроли ишлаб чиқишдан воз кечишини талаб қилган, Теҳрондагилар эса буни қабул қилмаганди.

Исроил ва АҚШ зарбаси оқибатида Эрон олий раҳбари оятуллоҳ Али Хоминаий ҳалок бўлди.