Ўзбекистон бозорларидаги нархлар жадвали: тухум арзонлаган, бодринг қимматлашган

Одатга кўра, 12 турдаги озиқ-овқат ва шунча мева-сабзавот маҳсулотларининг ўртача нархлари тўплаб, тартибланди. Ўтган ҳафтадаги нархларни солиштириш асносида бозорларда тухум нархи бироз пастлагани, ўсимлик ва пахта ёғлари, шунингдек, шакар нархи ҳамон қимматлигича қолаётгани, бодринг нархи кескин кўтарилгани ойдинлашмоқда.

Мол гўшти энг қиммат нарх — 75 минг сўм Тошкент шаҳрининг «Эски жува» бозорида белгиланган. Лекин шу бозорда мол гўштини килограммини 58 мингга ҳам харид қилиш мумкин. Жойларда қўй гўшти қимматлаб, унинг 1 килоси 70 мингдан 75 минг сўмгача сотилаётгани қайд этилди. Товуқ гўшти ҳамон Урганчда энг арзон — килоси 14,5 минг сўм.

Мева-сабзавотлар нархлари бозорларда бир-биридан кўп ҳам фарқ қилмайди. Помидор ва бодринг айрим ҳудудлар марказларида кескин қимматлаган.

Қайд этиш лозим, марказий деҳқон бозорларида маҳаллий ҳокимият раҳбарларининг нархларни тартибга солишга уриниши давом этмоқда.