Покистон Ўзбекистонга гўшт етказишни бошлади 

Қайд этилишича, 18 тонналик гўштнинг биринчи партияси шу ҳафта Тошкентга етиб келади. Март ойида яна 50 та контейнерда гўшт (жами 900 тонна) жўнатилиши кутилмоқда.

Покистоннинг Shaheen компанияси раҳбари Малик Шер Хоннинг таъкидлашича, Покистон имтиёзли савдо тўғрисидаги шартномалар тузилганидан кейин Ўзбекистон бозорига диққат билан қарай бошлаган.

4 март куни икки давлат ўртасида имтиёзли савдо тўғрисидаги битим имзоланган эди. Шавкат Мирзиёев ва Покистон бош вазири Имрон Хон товар айирбошлаш ҳажмини 500 миллион долларга етказиш имконияти борлигини таъкидлаб, Трансафғон темирйўлини янада ривожлантиришга келишиб олганди.

“Таъкидлаш жоиз, Ўзбекистон бир неча йиллардан буён транспорт йўналишларини диверсификация қилиш ва минтақавий алоқаларни ривожлантириш чораларини кўрмоқда. Шавкат Мирзиёевнинг сўзларига кўра, “Термиз – Мозори Шариф – Кобул – Пешовар” темирйўли қурилиши Покистонни Марказий Осиё билан боғлайдиган, Ўзбекистонни Карачи, Гвадар ва Қосим портларига олиб чиқадиган энг яқин, арзон ва хавфсиз йўлак яратади. Бу темирйўл минтақаларимиз қиёфасини бутунлай ўзгартириб юборади”, дейилади маълумотда.

2021 йил ноябрь ойида Ўзбекистондан биринчи транзит юк Покистонга етиб борган эди. Покистон томони буни “ҳамкорликнинг янги даврининг бошланиши” деб баҳолади. Кўп ўтмай Покистон Ўзбекистондан юк ташувчилар учун божхона тартиб-таомилларини соддалаштирди — юк машиналари кириш тўлови бўйича депозит тўламасдан мамлакатга кириши мумкин.