Қўқоннинг “Тайсон”и: Фарғонада эркак бозор назоратчисининг қулоғини тишлаб, узиб олгани учун қамалди

Фарғонада бозор назоратчисининг қулоғини тишлаб, узиб олган шахс жиноий жазога тортилди. Kun.uz суд ҳукми билан танишди.

Суд ҳужжатида келтирилишича, 2025 йил 14 октябр куни Қўқон шаҳрининг Урганжибоғ маҳалласидаги бозорда икки сотувчи аёл жой талашиб, жанжаллашган. Бозор назоратчиси бўлиб ишловчи Қ.О. воқеа жойига келиб, уларни ажратиб қўйишга уринган. Шунда шу ерда сомса сотувчи бошқа бир аёлнинг 38 ёшли ўғли Ҳ.И. назоратчи билан жанжаллашиб кетган.

Эркак бозор назоратчисини аввалига қўллари билан урган. Сўнгра унинг қулоғини тишлаб, бир қисмини узиб олган.

Судга оид тиббий экспертиза бозор назоратчисининг “ўнг қулоқ супрасида юзага келган чандиқ вақт ўтиши билан билинмайдиган даражада тўлиқ силлиқланиб кетмаслиги ва унга нисбатан пластик операция, чандиқ етилганидан сўнг ўтказиш талаб қилиниши” ҳақида хулоса берган.

Ҳ.И. судда айбига қисман иқрор бўлган ва бозор назоратчиси онаси сомса сотадиган аравачани тортқилагани учун жанжаллашганини билдирган.

“Онам сомса сотадиган аравачани тортқилаб, бу ердан йиғиштиришни айтди. Мен аравачага тегмаслигини сўраганимда қўпол муомала қилди. Шунда унинг юзига икки маротаба уриб юбордим. У мени оёғимдан чалиб йиқитди ва устимга ўзи йиқилди. Назоратчининг ўнг қулоғини тишлаб, узиб олдим: қулоғининг бир бўлаги оғзимда қолиб кетди”, деган ўз кўрсатмасида судланувчи.

Шу тариқа, уларни атрофдагилар ажратиб қўйишган.

Жабрланувчи судда ҳозирги кунга қадар қулоғини даволатиш учун қарийб 14 млн сўм сарфлаганини, эндиликда пластик операция қилдириш учун яна 70 млн сўм кераклигини айтиб, судланувчидан етказилган моддий зарарларни ундириб беришни сўраган.

ЖИБ Фурқат туман судининг 2026 йил 13 мартдаги ҳукми билан Ҳ.И. Жиноят кодексининг 104-моддаси (қасддан баданга оғир шикаст етказиш) 2-қисми “б,е” бандида назарда тутилган жиноятни содир этганликда айбли деб топилган. Унга Жиноят кодексининг 57-моддаси қўлланган ҳолда 3 йил озодликдан маҳрум қилиш жазоси тайинланган. Жазони умумий тартибли колонияларда ўташ белгиланган.

Судланувчига қўлланган гаров эҳтиёт чораси ўзгартирилиб, у дарҳол суд залида қамоққа олинган.

Шунингдек, судланувчидан жабрланувчи фойдасига 13 млн 752 минг сўм моддий зарар ундириш белгиланган.