Тошкент – водий йўлининг бир қисмида максимал тезлик пасайтирилди

Тошкент вилояти ҳудудидан ўтувчи А-373 «Тошкент-Оҳангарон-Ангрен-Қўқон-Шаҳрихон-Андижон» халқаро аҳамиятга эга автомобиль йўлининг айрим қисмларида рухсат этилган ҳаракат тезлиги пасайтирилади. Бу Халқ депутатлари Тошкент вилояти кенгашининг 8 июндаги қарорида белгиланган.

Қарорга кўра, Оҳангарон тумани ҳудудидан ўтувчи А-373 автомобил йўлининг 103–131-километрлари оралиғида, учта аҳоли яшаш жойидан ташқарида жойлашган қисмларда йўл-транспорт ҳодисаларининг олдини олиш ва ҳаракат хавфсизлигини таъминлаш мақсадида янги тезлик чекловлари жорий этилади.

Ҳужжатга мувофиқ, M1, M2 ва N1 тоифасидаги транспорт воситалари, яъни енгил автомобиллар, 8 нафардан кўп бўлмаган йўловчига мўлжалланган микроавтобуслар ҳамда оғирлиги 3,5 тоннагача бўлган юк автомобиллари учун максимал тезлик соатига 80 километр этиб белгиланади. N2 ва N3 тоифасидаги, яъни оғирлиги 3,5 тоннадан юқори бўлган юк автомобиллари, жумладан, йирик юк машиналари учун эса тезлик чеклови соатига 50 километрга туширилади.

Қарор иловасида келтирилишича, ҳозир мазкур участкаларда рухсат этилган тезлик соатига 100 километрни ташкил этади. Янги тартиб 103–104, 105–106, 108–109 ва 109–131-километрлар оралиғидаги қисмларга татбиқ этилади.

Ҳужжатда қайд этилишича, тезликни пасайтириш ташаббуси Йўл ҳаракати хавфсизлигини таъминлаш бўйича ҳудудий махсус комиссия таклифи асосида ишлаб чиқилган. Лойиҳа жамоатчилик муҳокамаси учун regulation.gov.uz порталига жойлаштирилган ва муҳокама муддати 27 май куни якунланган.

Қарорга мувофиқ, «Қамчиқавтойўл» ихтисослаштирилган йўллардан фойдаланиш корхонаси ўн кун муддат ичида мазкур ҳудудларда 80 ва 50 км/соат тезлик чекловларини кўрсатувчи йўл белгилари ўрнатиши керак.

Тошкент вилояти кенгаши қарорда тезлик чекловларини ўзгартиришдан мақсад фуқаролар хавфсизлигини таъминлаш ва йўл-транспорт ҳодисалари сонини камайтириш эканини таъкидлаган.