Хитой хавфсизлик нуқтайи назаридан барча электромобилларда «яширин» эшик тутқични тақиқлади

Хитой тез орада электромобилларнинг яширин эшик тутқичларини тақиқлайди. 2 феврал куни Саноат ва ахборот технологиялари вазирлиги томонидан эълон қилинган қоидаларга кўра, энди Хитойда сотиладиган ҳар қандай автомобил юкхонасидан ташқари, ҳар бир эшикнинг ички ва ташқи томонидан очиладиган механик механизм билан жиҳозланиши керак.

Баёнотда айтилишича, янги қоидалар «автомобил конструкцияларининг хавфсизлик даражасини оширади».

CNN хабарида қайд этилишича, бу орқали Хитой биринчи марта Tesla автомобилларида жорий этилган бундай дизайнлардан фойдаланишни тақиқлаган биринчи мамлакат бўлди.

Келгуси йилнинг 1 январидан кучга кирадиган янги қоидаларга кўра, ҳар бир автомобилда эшикни қўлда очиш учун камида 6х2х2,5 см ўлчамдаги бўш жой бўлиши керак. Автомобил ичида йўловчилар учун эшикни қандай очиш кераклиги кўрсатилган ёзувлар ҳам жойлаштирилиши лозим.

Ҳукумат томонидан тасдиқланган ва Хитой бозорига киришга тайёргарлик кўраётган автомобиллар 2029 йилгача эшикларини очиш механизмини янгилаши керак бўлади.

Яширин эшик тутқичи Хитойда кенг тарқалган дизайн ечимига айланди, China Daily нашри маълумотига кўра, улар энг кўп сотиладиган 100 та электр ва гибрид автомобилларнинг тахминан 60 фоизига ўрнатилган.

Янги стандартлар фақат Хитойда сотиладиган автомобилларга тааллуқли бўлса-да, улар бутун дунё бўйлаб автоишлаб чиқарувчиларни эшик дизайнини қайта кўриб чиқишга ундаши мумкин, чунки Хитой электромобиллар технологиясида глобал етакчи ҳисобланади.

Бундай чора-тадбирлар Хитойда содир бўлган бир қатор ҳалокатли бахтсиз ҳодисалар, жумладан, Xiaomi русумли икки автомобил ёниб кетиши ортидан амалга оширилди.

Октябр ойида Чэнду шаҳрида Хитойнинг Xiaomi компаниясига тегишли SU7 электромобили иштирокида ҳалокатли ЙТҲ содир бўлган, гувоҳлар машина эшигини очолмаган ва ҳайдовчини тириклайин ёниб кетишдан қутқара олмаганди.

BYD ижрочи вице-президенти Стелла Ли Bloomberg TV телеканалига интервюсида компания ҳукумат талабларига жавоб бериш учун дизайн ўзгаришларини киритишга тайёрлигини айтди.

Американинг Tesla компанияси ҳам Хитойга етказиб бериладиган автомобиллар учун зарур ўзгаришларни амалга оширишини тасдиқлади.