Urganch aeroportidan yo‘lovchilarning Nukusga transferi uchun bepul avtobus qo‘yiladi

Shu yil 20 iyuldan 7 avgustgacha Urganch xalqaro aeroporti yopiladi. Transport vazirligining xabar berishicha, bu vaqtda aeroport rekonstruksiya qilinadi, shu sababli vaqtincha yopiladi.

“Uzbekistan Airways” aviakompaniyasi Urganchdan rejalashtirgan aviaqatnovlarining bir qismi Nukus xalqaro aeroportiga ko‘chiriladi. Yo‘lovchilarga qulaylik yaratish maqsadida “Uzbekistan Airports” tomonidan Urganch va Nukus aeroportlari o‘rtasida avtobus qatnovi tashkil etilmoqda.

Vazirlikning Kun.uzʼga ma’lum qilishicha, yo‘lovchilar aeroport tashqarisida kutib olinadi, avtobuslar “Uzbekistan Airways” aviakompaniyasi qatnovi uchun chiptasi borlarga bepul xizmat qiladi.

Qatnov jadvali bilan kompaniya saytida batafsil tanishish mumkin.

Qo‘shimcha ma’lumot olish va avtobuslar jadvaliga aniqlik kiritish uchun O‘zbekiston aeroportlari aloqa markaziga murojaat qilinadi.

Eslatib o‘tamiz, Urganch xalqaro aeroporti yopilishi haqida iyun oyining oxirida xabar berilgandi. Unga ko‘ra, ta’mirlash jarayonida uzunligi 3000 m va eni 16 m bo‘lgan uchish-qo‘nish yo‘lagi yuzasini butunlay almashtirish va mustahkamlash rejalashtirilgan. Shuningdek, ikkinchi va uchinchi yurish yo‘laklari kapital ta’mirlanadi.

Ta’mirlash ishlari yakunlangach, aeroport Boeing 787 va Airbus A330 kabi keng fyuzelyajli samolyotlarni cheklovlarsiz qabul qila olishi aytilmoqda.

Ma’lumot uchun, Urganch shahridagi uchish-qo‘nish yo‘lagini kapital rekonstruksiya qilish oxirgi marta 1997 yilda, shikastlangan qismlarini qisman ta’mirlash esa 2018 yilda amalga oshirilgan edi.