Turkiyaning Suriya bilan chegaradosh hududlaridan odamlar evakuatsiya qilinmoqda

Turkiya hukumati Suriya bilan chegaradosh bo‘lgan Gaziantep viloyatidagi Karqamish tumanidan odamlarni evakuatsiya qilmoqda, deb ma'lum qildi SNN Turk telekanali.  

23 avgustda Suriyaning shimolidagi Jarablus shahridan Karqamish o‘qqa tutilgan. Jarablusda o‘rtamiyona Suriya muxolifati va IShID terrorchilik guruhi o‘rtasida to‘qnashuvlar ketmoqda. Turkiya qurolli kuchlari bunga javoban IShID pozitsiyalarini artilleriya qurolidan o‘qqa tutgan. 

Turkiya hududining o‘qqa tutilishi oqibatida hech kim jabrlanmagan. Suriyadan otilgan snaryadlardan biri Karqamish meriyasi binosi yonidagi xiyobonga tushgan.  

Politsiya mahalliy aholini chegaraoldi hududini tark etishga chaqirmoqda. Odamlarni evakuatsiya qilish uchun avtobuslardan foydalanilmoqda. Ta'kidlanishicha, evakuatsiya ko‘ngilli tarzda amalga oshirilmoqda.