2016-2017 o‘quv yilida 640 ming o‘quvchi 1-sinfga chiqdi

O‘zbekistonda 2016-2017 o‘quv yilida 640 ming bola 1-sinfga chiqdi. Bu haqida Xalq ta'limi vazirligining (XTV)  matbuot xizmati ma'lum qildi. 

Ta'lim vazirligining xabariga ko‘ra, maktabda ularga Prezident sovg‘alari (portfel, o‘quv qurollari va darsliklar) topshirildi.

XTVning ta'kidlashicha, yangi o‘quv yilida yurtimizning barcha maktablaridagi ilk dars O‘zbekistonning Birinchi Prezidenti Islom Karimov xotirasiga bag‘ishlandi. "Xotira darsi"da o‘quvchilar Islom Karimovning hayoti va faoliyatiga to‘xtalib o‘tishdi.

Vazirlik ma'lumotlariga ko‘ra, O‘zbekistonda 9,7 ming umumta'lim maktablari faoliyat ko‘rsatadi, ularda 4,7 milliondan ortiq o‘quvchi ta'lim oladi.