Rossiya va O‘zbekiston rus neftini tashish yo‘nalishlarini muhokama qiladi

Rossiya va O‘zbekiston federatsiya hududidan neft tashish yo‘nalishlari hamda hajmini muhokama qilishni davom ettiradi. Bu haqda Rossiya Energetika vazirligi matbuot xizmatiga asoslangan holda Sputnik agentligi xabar bergan.

«O‘zbekneftgaz» va Rossiya energetika vazirligi o‘rtasida anglashuv memorandumi O‘zbekiston prezidenti Shavkat Mirziyoyevning Moskvaga tashrifi doirasida imzolangandi. Unga ko‘ra tomonlar turli sohalar qatori O‘zbekistonga neft yetkazib berish bo‘yicha hamkorlik qilishga kelishgandi.

Memorandumning amaliyotini muvofiqlashtirish uchun uch tomonlama ishchi guruh tashkil qilingan.

Rossiya Federatsiyasi energetika vaziri o‘rinbosari Kirill Molodtsovning ta'kidlashicha, O‘zbekistonga Qozog‘iston orqali neft yetkazishning ikkita ehtimoliy marshruti mavjud. Uning so‘zlariga qaraganda, ular hozirda o‘rganib chiqilmoqda.

Toshkentda 13-14 aprel kunlarida ikki mamlakat vakillari o‘rtasida uchrashuv o‘tkazilgan va unda O‘zbekistonga neft yetkazib berish sohasidagi munosabatlarning istiqbollari muhokama etilgandi.

Mart oyida, O‘zbekiston prezidentining Qozog‘istonga tashrifi doirasida «O‘zbekneftgaz» va «QazMunayGaz» kompaniyalari o‘rtasida neftgaz sohasida hamkorlik to‘g‘risida bitim imzolangandi. Unga ko‘ra, «QazMunayGaz» Rossiya neftini O‘zbekistonga tranzit qiladi.